ՀՀ առողջապահության նախարարությունը դիվանագիտական խողովակներով պաշտոնական Թբիլիսիին է փոխանցել իր ափսոսանքը գերատեսչության ղեկավար Արսեն Թորոսյանի խոսքերից հետո, հայտարարել է Վրաստանի արտաքին գործերի նախարար Դավիթ Զալկալիանին: Այս մասին հայտնում է RIA Novosti-ն:
«Հայաստանի առողջապահության նախարարությունից զանգահարել են Երևանում Վրաստանի դեսպանատուն, նախարարի անունից ափսոսանք հայտնել՝ կապված այն բանի հետ, որ նրա հայտարարությունները, որոնք, նրանց խոսքով, սխալ էին մեկնաբանվել, վշտացրել են իրենց վրացի գործընկերներին, ինչի կապակցությամբ էլ ափսոսանք են հայտնում և խնդրում իրենց դիրքորոշումը փոխանցել Թբիլիսիին»,- ասել է Զալկալիանին լրագրողներին:
Զալկալիանիի խոսքով՝ այն բանից հետո, երբ ԶԼՄ-ներով տարածվել են Արսեն Թորոսյանի հայտարարությունները, դեսպանությունը միանգամից կապ է հաստատել հայկական կողմի հետ:
«Իհարկե, մեղմ ասած, այս մեկնաբանությունը կոռեկտ չէր հարևան, բարեկամ երկրի նկատմամբ, հատկապես այնպիսի պաշտոնատար անձի կողմից, ինչպիսին առողջապահության նախարարն է», – հավելել է Զալկալիանին:
Ավելի վաղ Թբիլիսիի ինֆեկցիոն կլինիկայի բուժական մասի ղեկավար Մարինա Էզուգբայան հայտարարել էր լրագրողներին, թե Վրաստանը չի թաքցնում կորոնավիրուսով վարակվածների և վարակի հետևանքով մահացածների թվերը:
Ավելի վաղ հայտնել էինք՝ Վրաստանում զարմացել էին Արսեն Թորոսյանի «ոչ դիվանագիտական» հայտարարություններից:
Վրաստանի հիվանդությունների վերահսկման և կանխարգելման ազգային կենտրոնի ղեկավարը «ոչ դիվանագիտական էր» համարել ՀՀ առողջապահության նախարար Արսեն Թորոսյանի հայտարարությունները Վրաստանի հակահամաճարակային կառույցների վերաբերյալ։
Թորոսյանի խոսքերից հետո նրա խոսնակը հայտարարել է, թե նախարարի խոսքերը կտրվել են կոնտեքստից, ու ներկայացրել է սղագրությունը, որը համընկնում է հրապարակումների բովանդակությանը։
«Չեմ ժխտում, որ Վրաստանում սահմանափակող միջոցառումներն ավելի լավ, խիստ ու ուժեղ են իրականացվել, այդ թվում մինչ օրս։
Կա նաև մեթոդաբանության տարբերություն. նախ Վրաստանի առողջապահական համակարգը և հատկապես հակահամաճարակային համակարգը էականորեն տարբերվում է մեր հակահամաճարակային համակարգից, ոչ լավ իմաստով, իհարկե։ Մեր հակամաճարակային համակարգն ավելի ուժեղ է և ես դա չեմ ասում, որպես հպարտանալու մի բան, այլ պարզապես փաստ եմ արձանագրում՝ մասնագիտական մակարդակի, ոչ քաղաքական։
Ես հուսով եմ, որ մեր հարևանները, բոլորն էլ կկարողանան իրենց համակարգերն ուժեղացնել և մենք բոլորս պաշտպանված կլինենք։ Նույնը վերաբերում է Իրանի Իսլամական Հանրապետությանը, Ռուսաստանի Դաշնությանը. ինչո՞վ են այս երեք երկրները կարևոր, քանի որ հոսքերի առումով մենք շատ խոցելի ենք դառնում»։
