Եվրասիական ինտեգրման հարցերի մշտական հանձնաժողովի նախագահ, ԱԺ ԲՀԿ խմբակցության պատգամավոր Միքայել Մելքումյանը, անդրադառնալով նախօրեին Եվրասիական տնտեսական բարձրագույն խորհրդի շրջանակներում գազի գնի թեմայի հետ կապված քննարկումներին, «Առաջին լրատվական»-ի հետ զրույցում ասել էր, որ յուրաքանչյուր երկրի ղեկավար պետք է սպասարկի իր պետության շահը, և դա իրոք այդպես է: Սակայն, Մելքումյանի խոսքերով, հայ-ռուսական բարեկամությունը դարավոր արմատներ ունի։ «Մամուլում որոշակի շահարկումներ և ոչ օբյեկտիվ մեկնաբանություններ եղան «Բարգավաճ Հայաստան» ուղղվածության հետ կապված: Մեր հանրության մեջ թյուր կարծիքներ առաջացան, և ես հիմա ուզում եմ նշել, որ ռուս հայ-ռուսական բարեկամությունը՝ անկախ օրվա իշխանություններից, դարավոր արմատներ ունի: Այդ առումով հայ-ռուսական բարեկամությունն անսասան է: Բնականաբար պետք է հաշվի առնել նաև տվյալ փուլի մարտահրավերները: Մեր կուսակցությունը իր հիմնադրման օրից ի վեր միշտ հայ-ռուսական հարաբերությունները բարձր է գնահատել բոլոր-բոլոր բնագավառներում: Մենք պատկերացնում ենք մեր երկրի ու ժողովրդի ապագան ռուս ժողովրդի և Ռուսաստանի հետ բարյացակամ ռազմավարական գործընկերության շրջանակներում: Դրա վառ վկայություններից մեկն էլ այն է, որ մենք ԵԱՏՄ-ի անդամ ենք, ՀԱՊԿ-ի անդամ ենք»,- հավելեց նա:
Մելքումյանի խոսքերով՝ գազի գնի հետ կապված մեր շահերի սպասարկման մասին խոսելիս չի կարելի դա հակադրել արմատական միջպետական և ժողովուրդների միջև բարեկամությանը. «Այսինքն՝ եթե մենք գազի գնի շուրջ մեր շահերը պաշտպանենք, դա հակադրում են ԲՀԿ-ի ուղղվածությանը: Միանշանակ պետք է ասեմ, որ մեր կուսակցության կողմից իր դիրքորոշումներից որևէ շեղում չկա: Ինչպես մենք մեր ռազմավարական գործընկերոջ նկատմամբ վերաբերմունքը բարձր ենք գնահատել, նույնկերպ շարունակում ենք: Որևէ կերպ չի կարելի մանիպուլացնել և որոշակիորեն շեղել ուշադրությունը այն օբյեկտիվ փաստից, որ ԲՀԿ-ն միշտ էլ եվրասիական ուղղությունը, դեպի Ռուսաստան ուղղությունը, դեպի ավելի խորացված ինտեգրացիան պատկերացնում է որպես գերակա անհրաժեշտություն մեր երկրի համար թե՛ այսօր, թե՛ վաղը»: