Ժողովրդավարությունը մերժող իշխանությունների համար այնքան էլ կարևոր չէ իրենց վարկանիշը: Իսկ երբ իշխանությունը չի մերժում ժողովրդավարությունը և ունի հանրային վստահության մեծ պաշար, արժևորում է բարձր վարկանիշը: Բայց գալիս է ժամանակ, երբ օբյեկտիվորեն իշխանության վարկանիշը աստիճանաբար սկսում է նվազել, սա անխուսափելի գործընթաց է: Հիմա շատ են պնդումներն այն մասին, որ հեղափոխական իշխանությունը մսխում է իր վարկանիշը, հանրային վստահությունը: Վարակնիշը մսխելու երկու ճանապարհ կա՝ կա՛մ անգործությամբ, կա՛մ համակարգային կտրուկ, ոչ պոպուլիստական փոփոխություններով:
Ի՞նչ փուլում է հիմա Հայաստանի իշխանությունը: «Առաջին լրատվական»-ի հետ զրույցում անդրադառնալով այս հարցին երգահան, բարդ Էդուարդ Զորիկյանը նշեց. «Առաջին անգամ ունենք ժողովրդի կողմից ընտրված իշխանություն: Եթե տարիների ընթացքում վարկանիշն ընկնի, առաջին հերթին դա իշխանության խնդիրն է, պետք է մտածի այդ մասին, երկրորդ հերթին՝ ընդդիմության աչքը լույս. թող ակտիվանան, կազմավորվեն, կազմակերպվեն, օրենքի շրջանակներում այնպիսի քայլեր անեն, որ հաջորդ լեգիտիմ ընտրված իշխանությունն իրենք լինեն: Ամեն դեպքում մենք պետք է ստույգ մի բան հասկանանք՝ մենք բռնել ենք օրինականության ճանապարհը, և ցանկացած քայլ պետք է արվի օրենքով:
Մենք պիտի հիշենք, որ օրինապաշտ ժողովուրդ ունենք… Պիտի հիշենք, որ 88-ի հեղափոխության ժամանակ կանայք գոռում էին՝ մենք ուզում ենք հարազատ իշխանություն ունենալ: Պիտի հիշենք, որ ամեն ինչի հիմքում ժողովուրդն է՝ պետության, իշխանության, ընդդիմության, և պիտի շարունակենք ժողովրդավարության ճանապարհով առաջ ընթանալ»:
Էդուարդ Զորիկյանն անդրադարձավ նաև դիտարկմանը, որ առաջին անգամ ունենք ժողովրդի կողմից ընտրված իշխանություն, բայց ամեն կողմից հարվածում են: «Եթե ընդդիմությունը հանդես գա ավելի մեծ կշիռ ունեցող և ժողովրդի սրտին ավելի մոտ առաջարկներով, ժողովուրդը կկանգնի նրա թիկունքում: Ամեն ինչի հիմքում գործն է: Նիկոլ Փաշինյանի իշխանությունը, ինչքան էլ այս ընթացքում վարկանիշ է կորցնում, սայթաքում է, ժողովուրդը մատների արանքով է նայում, քանի որ նժարի վրա է դնում Փաշինյանի իշխանությունը և քարկոծողներին, և հասկանում է, որ նժարները հավասար չեն: Բացի նախկիններից, շատերն էլ քարկոծում են, քանի որ պաշտոն չեն ստանում…»:
Մանրամասն՝ տեսանյութում:
