«Համայնքային ենթակայության մանկապարտեզները վաղվանից կվերաբացվեն: Ըստ նախնական հարցումների՝ մոտ 11 հազար երեխա կհաճախի մանկապարտեզ՝ հիմնականում այն ծնողների երեխաներն են, որոնք աշխատում են»,- «Առաջին լրատվական»-ի հետ զրույցում ասաց փոխքաղաքապետ Տիգրան Վիրաբյանը՝ հավելելով, որ նախատեսվում է մանկապարտեզներում համաճարակի տարածումը կանխարգելող բոլոր կանոնները պահպանել: Փոխքաղաքապետի հավաստմամբ՝ ձեռք են բերվել 160 հազար դիմակ, 4-5 հազար լիտր ալկոգել, բախիլներ և ջերմաչափեր. «Անվտանգության նորմերը կպահպանվեն, բայց չենք կարող հարյուր տոկոսով վստահ լինել… Կան մանկապարտեզներ, որոնք չեն վերաբացվի»:
Ի՞նչ ճակատագիր է սպասվում դպրոցներին, մշակութային օջախներին: Ի պատասխան այս հարցի՝ Տիգրան Վիրաբյանը նշեց, որ ահռելի ջանքեր ներդնելով՝ հնարավոր դարձավ հեռավար կրթությունը բերել առօրյա կյանք և դարձնել կիրառելի. «Ատեստատների հանձնման արարողությունը կկազմակերպվի բացօթյա տարածքներում, անվտանգության նորմերը պահելով: Վերջին զանգի և խնջույքների կազմակերպումը կբացառվի»:
Ինչ վերաբերում է թատրոնին, փոխքաղաքապետի խոսքով, թեև օնլայն տարբերակով ներկայացումներ ցուցադրվեցին, սակայն ևս մեկ անգամ պարզ դարձավ, որ թատրոնը կենդանի շփման տարածք է:
«Համավարակը ստիպեց շատ հարցերում վերաիմաստավորել և վերաարժևորել ամեն ինչ, նոր ճանապարհներ փնտրել ու հետաքրքիր մոտեցումներ դրսևորել,- ընդգծեց մեր զրուցակիցը:
Մանրամասն՝ տեսանյութում: