Երևանում կստեղծվի «Հայաստանյան և թուրքական տուրիստական ընկերությունների ասոցիացիա»: Այս մասին այսօր հուշագիր է ստորագրվել արդյունաբերողների և գործարարների միության և Վանի առևտրաարդյունաբերական պալատի միջև:
ԱԳՄ նախագահ Արսեն Ղազարյանի խոսքով, ասոցիացիայի հիմնական նպատակը հայաստանյան և թուրքական տուրիստական կազմակերպությունների միջև հարաբերությունների համակարգումն է: Նա նշել է, թե նման միջոցառումները նպաստում են երկու պետությունների գործարարների միջև բիզնես կապերի կարգավորմանը. «Դրանք հնարավորություն են տալիս նաև Թուրքայի կողմից Հայաստանի նկատմամբ իրականացվող միակողմանի շրջափակման պայմաններում գործունեության դաշտ ստեղծել գործարարների համար»:
Թուրքական պատվիրակության ղեկավար, Վանի առևտրաարդյունաբերական պալատի անդամ Աբդուլա Թունջդեմիրը հայտարարել է, թե զբոսաշրջության ոլորտում համագործակցության լայն հնարավորություններ է տեսնում:
«Առաջին լրատվական»-ի աղբյուրները հաղորդում են, որ շուտով Երևանում բացվելու է նաև Turkish Airlines ընկերության ներկայացուցչությունը: Ըստ ամենայնի, ՀՀ ներկայիս ղեկավարությունը հայ-թուրքական հարաբերությունների քաղաքական գործընթացներում կրած ձախողումները փորձում է փոխհատուցել և տնտեսական ոլորտում սկսել է քայլեր ձեռնարկել ընդհանուր շահեր ստեղծելու ուղղությամբ:
