Շտապ բժշկական օգնության գործակարգավարական (դիսպետչերական) համակարգի արդիականացման նպատակով 2011-2012 թթ. կտրամադրվի 85 միլիոն դրամի աջակցություն՝ թվային կապի համար անհրաժեշտ սարքավորումներ ձեռք բերելու, ինչպես նաև՝ դիսպետչերական ծառայության համար անհրաժեշտ թվային ռադիոկապի համակարգի ստեղծման նպատակով: Այս մասին այսօր ասուլիսում տեղեկացրեց ՀՀ առողջապահության նախարար Հարություն Քուշկյանը:
Ֆինանսական միջոցները կհատկացնի ՎիվաՍել-ՄՏՍ ընկերությունը, որը կտրամադրի նաև իր 3G/3.5G ցանցը:
Շտապ բուժօգնության արդիականացման ռազմավարությունը հաստատվել է ՀՀ կառավարության համապատասխան որոշմամբ դեռևս 2010 թվականին: Վերանորոգվել է 1-03 ծառայության գործակարգավարական կենտրոնը, տեղադրվել է գլոբալ նավիգացիոն համակարգ, Երևանի քարտեզով նավիգատորներ, համակարգչային և զանգերի ձայնագրման սարքավորում, կենտրոնի և ենթակայանների միջև ստեղծվել է լուսամանրաթելային կապ և այլն:
Շտապ բուժօգնության արդիականացման շրջանակներում ստեղծվել է արբանյակային վերահսկողության և դիսպետչերական համակարգ, որն իրականացնում է շտապօգնության մեքենաների համակողմանի վերահսկողություն՝ ներառյալ ավտոմատ կերպով կանչի գրանցումը, մեքենայի տեղ հասնելն ու հիվանդին համապատասխան բուժկենտրոն տեղափոխելը: Նախ՝ GPS արբանյակների միջոցով որոշվում է մեքենայի աշխարհագրական դիրքը, որից հետո կատարվում է տվյալների հավաքագրում բուժխմբի զբաղվածության, ինչպես նաև խմբի տեսակի վերաբերյալ: Մեքենայից 3G/3.5G ցանցերի միջոցով այդ տվյալներն ուղարկվում են կենտրոնական սերվերին: Կանչը ստանալուն պես գրանցվում են բոլոր տվյալները: Դիսպետչերը, մոնիտորին նայելով, որոշում է ազատ մեքենան և այն ուղղորդում կանչը սպասարկելու: Ընթացքում GPS և 3G/3.5G միջոցով կատարվում է կանչի մոնիթորինգ: Մեքենաներում տեղադրված նավիգատորները թույլ են տալիս վարորդին լուծել հասցեին ամենակարճ ճանապարհով մոտենալու խնդիրը՝ ինչը թույլ է տալիս նվազագույնի հասցնել շտապօգնությունը «դիմավորելու» անհրաժեշտությունը: Քարտեզի վրա բուժհաստատությունների նախապես նշված լինելը թույլ է տալիս արագ որոշել, թե որ հիվանդանոցն է առավել նպատակահարմար հիվանդի համար:
Այս համակարգի ներդրումը նպաստում է կանչի իրականացման օպտիմալացմանը, հիվանդին տեղ հասցնելու ժամանակի կրճատմանը, բուժխմբերի աշխատանքի որակի բարձրացմանը, ինչպես նաև թույլ է տալիս էականորեն նվազեցնել վառելիքի ծախսը:
