Հանքային ջուրն առանց բժշկական ցուցումի չի կարելի օգտագործել: Այսօր լրագրողների հետ հանդիպման ժամանակ հայտարարեց ՀՀ առողջապահության նախարարության կուրորտաբանության և ֆիզիկական բժշկության գիտահետազոտական ինստիտուտի բուժական գծով փոխտնօրեն Մկրտիչ Արտեմի Գրաբսկին՝ հավելելով, որ առողջ մարդը պետք է խմի խմելու ջուր, որովհետև հանքային ջուրն իր մեջ պարունակում է նյութեր և աղեր, որոնց անսահմանափակ օգտագործումը կարող է առողջ մարդու մոտ հիվանդությունների պատճառ դառնալ:
«Արտադրանքի տերը մտածում է իր արտադրանքը գովազդելու մասին, սակայն դա ունի բազմաթիվ հակացուցումներ»,- ընգծեց Մ.Գրաբսկին:
Անդրադառնալով Հայաստանում կուրորտային բուժական հանգստին՝ Մ.Գրաբսկին ընդգծեց, որ այստեղ այդ մշակույթը չի վերահսկվում:
«Կան շատ կոնցեպտուալ խնդիրներ. մենք կուրորտային հիմնարկների լիցենզավորման և որակի խնդիր ունենք: Դրանք չեն ապահովում բժշկական օգնության մինիմալ մակարդակը, չնայած կառավարության համար սա համարվում է գերակա խնդիր, և կան պետական մակարդակով ծրագրեր»,- նշեց Մ. Գրաբսկին՝ ցավով հավելեով, որ բնակչության շատ չնչին հատվածն իրեն կարող է թույլ տալ օգտվել նման կենտրոններից, որովհետև չկա հստակ հիմնավորված գնային քաղաքականություն, իսկ նման կենտրոնների կարիք ունեն հենց ամենաաղքատ խավի ներկայացուցիչները՝ թոշակառուները, սոցիալական ծանր պայմաններում ապրող մարդիկ:
«Այս խնդիրների մասին պետք է մտածեն կուրորտային բուժական հիմնարկների տնօրենները, որոնք իրենց հիմնարկում թագավոր են զգում»,- շարունակեց Մ. Գրաբսկին: Ուստի նա խորհուրդ տվեց, մինչ այդպիսի հիմնարկություններից օգտվելը, դիմել ընտանեկան բժշկին և արդեն պատրաստի բժշկական ցուցումներով գնալ կուրորտային հանգստի:
