Թուրքական Zaman թերթի փոխանցմամբ՝ Թուրքիայի Ազգային մեծ ժողովի (ԹԱՄԺ) նորընտիր նախագահ, իշխող «Արդարություն և զարգացում» կուսակցությունը (ԱԶԿ) ներկայացնող Ջեմիլ Չիչեքը հայտարարել է, որ Սահմանադրության փոփոխումը Թուրքիայի ամենացավոտ և ամենակարևոր հարցն է.
«Այսուհետ անհնար է, որ Թուրքիան շարունակի առաջ շարժվել հակաժողովրդավարական ղեկավարության պատրաստած սահմանադրությամբ։ Այդ կարևոր խնդրի լուծման համար անհրաժեշտ է, որ ԹԱՄԺ-ում տիրի ժողովրդավարական մթնոլորտ։
Անհրաժեշտ է, որ նոր Սահմանադրության տեքստի մշակմանը մասնակցեն ոչ միայն ԹԱՄԺ-ում ներգրաված քաղաքական կուսակցությունները, այլև ԹԱՄԺ-ից դուրս մնացած քաղաքական ուժերը, ինչպես նաև հասարակական կազմակերպությունները։
Անհրաժեշտ է հնարավորինս շուտ ընդունել նոր Սահմանադրություն։ Դա կնպաստի նաև քրդական հարցի լուծմանը։ Նոր Սահմանդրության ընդունումը ԹԱՄԺ-ի պարտքն է թուրք ժողովրդին»։
Հիշեցնենք, որ 1980 թվականի սեպտեմբերի 12-ին Թուրքիայի Հանրապետության պատմության ընթացքում տեղի ունեցած ամենաարյունալի ռազմական հեղաշրջումից հետո՝ 1981 թվականի հունիսի 29-ին, թուրքական ռազմական խունտան ընտրեց 160 խորհրդատուի, որոնց հանձնարարեց զբաղվել նոր Սահմանադրության մշակմամբ:
Վերջիններս առաջ քաշեցին 800 նոր օրենքներ: 1982 թվականի նոյեմբերի 7-ին նոր Սահմանադրությունը դրվեց հանրաքվեի ու ստացավ մասնակիցների 92 տոկոսի աջակցությունը: Դրանով մեծ լիազորություններ շնորհվեցին ուժային ու դատական կառույցներին, որոնց իրավունքների սահմանափակման ուղղությամբ տարիներ շարունակ պայքարում է Էրդողանը, և առաջիկա նոր Սահմանադրությունը գործուն քայլ կհանդիսանա տվյալ ուղղությամբ։
