Անդրադառնալով ՀԱԿ-իշխանություն երկխոսությանը՝ ՀԴԿ նախագահ Արամ Սարգսյանը լրագրողների հետ հանդիպմանը նշեց.
«Երկխոսությունն առհասարակ լինում է, երբ կա խնդիր, և այն ունի կարգավորման կարիք։ Եթե ընդունենք, որ իշխանությունը ընդունել է ՀԱԿ-ի առաջարկած օրակարգը, ապա կլինեն արտահերթ ընտրություններ, բայց ինձ համար դա մի տեսակ թատերական ներկայացում է, որտեղ մի կողմը կորցրեց իր ազդեցությունը ժողովրդական մասսաների վրա, իսկ մյուս կողմը օգտվեց դրանից: Իշխանությանը ձեռք է տալիս ռադիկալ ընդդիմություն ունենալը»:
Արամ Սարգսյանը նաև նշեց, որ պետք է ձևավորել ապստամբության մթնոլորտ, որտեղ, որպես հստակ պահանջ, այդ ընտրությունները կկայանան: Սարգսյանի խոսքով՝ երկխոսության համատեքստում երկու կողմն էլ ազատական շուկայական հարաբերությունների, վայրի կապիտալիզմի կողմնակիցներ են և նրանց միջև չկան գաղափարական տարբերություններ.
«Գաղափարական տարբերություն իշխանություների հետ ունեն այլ ուժեր՝ մեր նման կուսակցությունները, ովքեր դեմոկրատական սոցիալիզմի կողմնակիցներ են»:
