Ադրբեջանական ANS PRESS-ի փոխանցմամբ՝ Թուրքիայում գտնվող Կովկասի մուսուլմանների վարչության նախագահ, շեյխ ուլ իսլամ Ալլահշուքյուր Փաշազադեն հանդիպումներ է ունեցել Թուրքիայի նախագահ Աբդուլլահ Գյուլի և վարչապետ Ռեջեփ Էրդողանի հետ։ Այդ հանդիպումներում քննարկման գլխավոր առարկա է հանդիսացել ղարաբաղյան հիմնախնդիրը։
Հանդիպումից հետո Թուրքիայի նախագահը պատասխանել է լրագրողների հարցերին։ Դրանցից մեկն էլ առնչվել է ԱՄՆ պետքարտուղար Հիլարի Քլինթոնի կողմից Թուրքիայում բարձրաձայնված ցյուրիխյան արձանագրությունների վավերացմանը։
Գյուլն ընդգծել է, որ հակված է բանակցությունների միջոցով ղարաբաղյան հիմնախնդրի խաղաղ կարգավորմանը. «Ռուսաստանի նախագահ Դմիտրի Մեդվեդևի կողմից Կազանում կազմակերպված Հայաստանի ու Ադրբեջանի նախագահների հանդիպման ժամանակ տեղի են ունեցել տևական քննարկումներ։ Մեզ հայտնի է, որ տվյալ հանդիպման ժամանակ գտնվել է մի շարք հարցերի լուծման բանալին։
Վերջիվերջո, Կովկասում պետք է տիրի խաղաղություն։ Մեկ տարածաշրջանի երկրների՝ Թուրքիայի, Ադրբեջանի ու Հայաստանի միջև պետք է հաստատվեն բարեկամական հարաբերություններ։ Լիովին ակնհայտ է, որ այդպիսի հարաբերությունների ստեղծման համար պետք է ազատագրվեն «օկուպացված» տարածքները, փախստականները պետք է վերադառնան իրենց հարազատ օջախներ։ Սրանք կարևոր հարցեր են»։
