Այսօր՝ ապրիլի 28-ին, Ազգային ժողովում հրավիրվել է արտահերթ նիստ: Քննարկվում է 2020թ. պետբյուջեի մասին օրենքում փոփոխություն և լրացումներ կատարելու մասին օրենքի նախագիծը:
«Այո, ներկայացվող առաջարկը պոպուլիզմ է: Եթե «փող բաժանելու» մասին է խոսքը, կառավարությունն այսպես թե այնպես այդ փողը բաժանում է, բայց պետք է դա բաժանելու տրամաբանություն լինի: Այդ տրամաբանությամբ այսօր 14 ծրագիր է գործում»,- հայտարարեց ԱԺ փոխխոսնակ Ալեն Սիմոնյանը:
Նրա խոսքով` այսօր բաժանվում է 48 մլրդ դրամ և վերաբերում է մի քանի հարյուր հազար մարդու:
Անդրադառնալով Էդմոն Մարուքյանի ելույթին` Ալեն Սիմոնյանն ասաց. «Նույնիսկ լեզուն չի պտտվում ասելու, որ կառավարությունը 2 տարի լավ է աշխատել, գումար է ձևավորվել, ասում է` բախտի բերմամբ: Ի՞նչ բախտի բերմամբ, բա խի՞ չեք բախտի բերմամբ տենց գումար աշխատում կամ տենց հաջողություն ունենում: Դա բախտի բերմամբ չի, այլ կառավարության շարունակական աշխատանքի հետևանք: Նենգափոխելով, ֆոկուս-մոկուսներով ոչ ոք առաջ չի գնա»:
ԱԺ փոխնախագահն ասաց նաև, որ քաղաքական կուսակցությունը նախապես իմանում է` կառավարությունն ինչ ծրագիր է պատրաստում, և դա ինքն է առաջարկում և հետո հայտարարում` «ես ասեցի, արեցին». «Լուրջ չի կլասիկ քաղաքական գործչի համար: Այո, պոպուլիզմ է. մի հատ տենց կուսակցություն էլ կար` ՕԵԿ էր կոչվում, և ավանդների հետ կապված երկու տարի ընտրվեց, չնայած ավանդները մինչև վերջ այդպես էլ չստացան քաղաքացիները»:
Դիմելով հասարակությանը` Ալեն Սիմոնյանը հայտարարեց, որ կառավարությունն իրենց հետ եղել է ազնիվ, մնալու է ազնիվ և չի քաղելու դիվիդինդներ. «Որոշ գործընկերներ ամենաէժան դիվիդենդներն են անում, որը, ի դեպ, գիտեմ` ով է նրանց խորհուրդ տվել: Այդ մասին` հաջորդ անգամ»:
Մանրամասները՝ տեսանյութում:
