Ամերիկյան New York Times պարբերականն անդրադառնալով Թուրքիային, գրել է, որ, ամենայն հավանականությամբ, թուրքական իշխանությունները թաքցնում են կորոնավիրուսից մահացությունների իրական թիվը։ Նման եզրահանգման համար հիմք է հանդիսացել վերջին տարիներին Թուրքիայում գրանցված մահերի ընդհանուր վիճակագրության ուսումնասիրությունը։
Օրինակ, պարզվել է, որ Ստամբուլում 2020-ի մարտի 9-ից մինչև ապրիլի 12-ն ընկած ժամանակահատվածում մահվան դեպքերը նախորդ տարիների համեմատ աճել են շուրջ 30%-ով: Նաև միայն ապրիլի առաջին երկու շաբաթներին գրանցված մահվան ընդհանուր դեպքերի թիվը 50%-ով գերազանցել է նախորդ տարիների միջին ցուցանիշը։ Ընդ որում, մահվան դեպքերի աննախադեպ աճը գրանցվել է Թուրքիայում կորոնավիրուսից մահվան առաջին պաշտոնապես հայտարարված դեպքից՝ մարտի 17-ից դեռ շաբաթներ առաջ։
Վերլուծաբանները նշում են, որ միանշանակ չի կարելի պնդել, թե միջին վիճակագրական թիվը գերազանցող բոլոր մահվան դեպքերը կապված են կորոնավիրուսի հետ, բայց հիմքեր կան ենթադրելու, որ դրանց մի մասն, այնուամենայնիվ, պայմանավորված է կորոնավիրուսով:
Փորձագետներն այս տվյալները բավարար են համարում ենթադրելու, որ կորոնավիրուսի պատճառով գրանցված մահվան դեպքերը իրականում գերազանցում են պաշտոնապես հրապարակված թիվը:
