Թբիլիսիում բերման է ենթարկվել Սահակաշվիլիի Նախագահական գրադարանի ենթադրյալ հրկիզողը: Ըստ ՆԳՆ-ի, հրկիզողը նախկինում դատապարտված քաղաքացի Բ.Կ.-ն է, ծնված 1991 թ.-ին:
Տղամարդը հանցագործությունը կատարել է Facebook-յան ուղիղ եթերում: Տեսանյութը մինչ օրս հասանելի է սոցիալական ցանցում:
Հարուցվել է քրեական գործ՝ հրկիզմամբ ուրիշի ունեցվածքը վնասելու կամ ոչնչացնելու փաստի առթիվ: Ձերբակալվածին սպառնում է ազատազրկում՝ երեքից հինգ տարի ժամկետով:
Ըստ Արտակարգ իրավիճակների կառավարման ծառայության, գրադարանի 15 քմ մակերեսով տարածքներից մեկում այրվել է գրասենյակային գույքը: Տեղում մոբիլիզացվել է փրկարարական հրշեջների չորս խումբ:
Վրաստանի երրորդ նախագահի կողմից հիմնադրված գրադարանը բացվել է 2013 թվականին, Սահակաշվիլիի՝ որպես պետության ղեկավարի պաշտոնավարման ավարտից մեկ ամիս առաջ: Մարտի սկզբին այնտեղ սկսեց աշխատել քաղաքական գործչի շտաբը, որի աշխատանքներին նա միանում է հեռակա կարգով:
