«Ապրում եմ Գրանդ էստ քաղաքում: Մեր նահանգը, որի կենտրոնը Ստրասբուրգն է, համարվում է կորոնավիրուսի համաճարակից ամենաշատ տուժած նահանգներից մեկը: Փետրվարի վերջին մեր նահանգի քաղաքներից մեկում կրոնական հավաք տեղի ունեցավ, այնտեղ վարակված անձինք են եղել, հավաքից մոտ երկու-երեք օր հետո կորոնավիրուսի վարակը տարածվեց գրեթե բոլոր նահանգներում, իրավիճակը դարձավ անկառավարելի: Հայտարարվեց համազգային կարանտին: Արդեն մեկուկես ամիս է տնից դուրս գալիս պետք է հարցաթերթիկ լրացնենք՝ հիմնավորելով դուրս գալու նպատակը: Մեկ կիլոմետրից հեռու անգամ զբոսանքի իրավունք չունենք դուրս գալ: Ամուսինս աշխատում է, աշախտողները պետք է ցույց տան գործատուի կողմից տրված փաստաթուղթը, այլապես կտուգանվեն 100-150 եվրոյի սահմաններում, շատերը տուգանվել են: Այսինքն՝ ամեն ինչ խիստ է, ամեն ինչ լուրջ է: Փորձում ենք պահպանել սոցիալական հեռավորությունը, մարդիկ փոքր խանութներում դրսում են հերթ կանգնում:
Դիմակներ կրել չեն պարտադրում, քանի որ սահմանափակ են, դեղատնից կարող ես դիմակ գնել միայն դեղատոմսով, եթե հիվանդ ես»,- այս մասին «Առաջին լրատվական»-ի հետ տեսակապով զրույցում տեղեկացրեց ֆրանսաբնակ մեր հայրենակիցը՝ բլոգեր Ռոզա Սարգսյան Ֆենդերը՝ հավելելով, որ իրականացվող սահմանափակումների շնորհիվ վարակի տարածման տեմպերը սկսել են նվազել:
Բլոգերի խոսքով՝ Ֆրանսիայում իշխանություններն աշխատում են թափանցիկ, ինչը օգնում է գործին, քանի որ մարդիկ վստահում են և հավատում են, որ իրենցից ինչ-որ բան չեն թաքցնում:
Մանրամասն՝ տեսանյութում:
