Ապրիլյան քառօրյա պատերազմի քննիչ հանձնաժողովում Սերժ Սարգսյանի ՝ ենթահանձնաժողովների հարցերին պատասխանելուց հետո, հանձնաժողովի նախագահ Անդրանիկ Քոչարյանը հայտարարել էր, որ Սարգսյանը եկել էր բավականին պատրաստված և նրա խոսքը ի հայտ բերեց նաև բաներ, որոնք մինչ այդ հանձնաժողովին հատնի չէին:
Միաժամանակ, Անդրանիկ Քոչարյանը նշել է, որ Սերժ Սարգսյանն ասել է, թե կան բաներ, որոնց մասին բարձրաձայնել չի կարող մինչև 2050 թվականը, քանի որ չունի դրա իրավունքը: Թե հատկապես ինչի մասին է խոսքը, պարզ չէ, և գուցե Սերժ Սարգսյանն ինչ-որ բան ակնարկի այն մեծ ասուլիսի ընթացքում, որն Ապրիլյան պատերազմի թեմայով ազդարարել է արտակարգ դրությունից հետո: Հասկանալի է, որ կան պետական գաղտնիք, ռազմական գաղտնիք պարունակող իրողություններ, որոնք փակ պահելը պարտավորություն է: Այստեղ հետաքրքիր է ժամկետը, որ նշում է Սերժ Սարգսյանը՝ մինչև 2050 թվական: Հնարավոր է, որ դա պայմանավորված է ժամկետային սահմանափակումներով, թեև Սերժ Սարգսյանի դեպքում ստացվում է, որ կան բաներ, որոնք նա չի կարող ասել մինչև կյանքի վերջ:
Իհարկե, Սերժ Սարգսյանին մաղթում ենք քաջառողջություն ու երկարակեցություն, սակայն խոսքը 30-ամյա ժամկետի մասին է: Այդուհանդերձ, թիվն իսկապես խորհրդանշական է՝ 30-ը չէ, այլ 2050-ը: Բանն այն է, որ Հայաստանում Գյումրիի ռուսական 102-րդ ռազմակայանն, ըստ պայմանագրի, Հայաստանում է լինելու մինչև 2049 թվականը:
Ռազմակայանի մինչև այդ ժամկետը տեղակայման փոփոխությունը պայմանագրի մեջ եղավ հենց Սերժ Սարգսյանի նախագահության շրջանում, 2010 թվականին, երբ Հայաստան էր ժամանել ՌԴ նախագահ Մեդվեդևը: Սերժ Սարգսյանի նախագահության շրջանում Ռուսաստանն ակնհայտորեն բավականին ամրապնդեց իր տնտեսա-քաղաքական և ռազմական ներկայությունը Հայաստանում, ինչն ունի իր թե դրական, սակայն ընդհանուր առմամբ, իհարկե, բավականին մտահոգիչ ու ռիսկային հանգամանքները: Եվ այդ մտահոգիչ հանգամանքների առկայության վառ և, դժբախտաբար, խոսուն վկայություններից մեկը ու գլխավորը հենց Ապրիլյան քառօրյա պատերազմն էր: Պետք է թերևս ուղիղ արձանագրել, որ այն չէր լինի, եթե դա չուզեր Ռուսաստանը և եթե Ռուսաստանը չսնուցեր ադրբեջանական ագրեսիան ու լկտիությունը:
Եվ ինչ էր ստացում, որ Հայաստանում մի կողմից ավելանում էր ռուսական ռազմական ներկայությունը, մյուս կողմից, փաստորեն, դա նպաստում էր Հայաստանի խոցելիությանը: Ահա այդ տեսանկյունից էլ, Սարգսյանի խոսքը, որ կան բաներ, որոնք չի կարող բացել մինչև 2050 թվական, այսինքն՝ գոնե այս պահի ֆորմալ դրությամբ մինչև Հայաստանից ՌԴ ռազմակայանի հեռացում, ստանում է բավականին խորհրդանշական քաղաքական ակնարկի իմաստ, որ հնչում է կամա, թե ակամա: Մեծ հավանականությամբ, այդ ակնարկը ուղղված է հենց Ռուսաստանին, թե ինչ տողատակով, հնարավոր կլինի, թերևս, առավել ընդգրկուն դիտարկել Սերժ Սարգսյանի ասուլիսից հետո, որտեղ նա, թերևս, անկասկած կանդրադառնա Ապրիլյան քառօրյայում Ռուսաստանի դերին:
Լուսանկարը՝ Armeniasputnik-ի
