Երևանում ապրիլի 14-ին ծեծկռտուք է տեղի ունեցել «Ֆլագման» սրճարանի սեփականատիրոջ մասնակցությամբ, ինչի հետեւանքով նա մարմնական վնասվածքներ է ստացել: Այս մասին հայտնում է Shamshyan.com-ը։
Կայքի հաղորդմամբ՝ ոստիկանության կենտրոնական բաժնի հետաքննչական բաժանմունքում նյութեր են նախապատրաստվում ապրիլի 14-ին Երևանում տեղի ունեցած խուլիգանության փաստով: Ոստիկանության Մարաշի բաժանմունքի քրեական հետախուզության խմբի ծառայողները օպերատիվ տվյալներով պարզել են, Երևանի բնակիչներ, 35-ամյա Աշոտ Խանգելդյանը, 37-ամյա Նիկոլայ Խանգելդյանը, 32-ամյա Հարություն Ոսկանյանը, 42-ամյա Կարեն Դավթյանը, ինչպես նաև դեռևս ինքնությունները չպարզված մի խումբ անձինք ապրիլի 10-ին Երևանի Ալեք Մանուկյան փողոցում գործող «Ֆլագման» սրճարանում կոպիտ կերպով խախտել են հասարակական կարգը, այդ ընթացքում բացահայտ անհարգալից վերաբերմունք դրսևորել հասարակության նկատմամբ:
Պարզվել է, որ նրանք վիճաբանության մեջ են մտել Երևանի բնակիչներ, 48-ամյա Արտյոմ Խանդանյանի, 40-ամյա Լյովա Պողոսյանի, Փարաքար գյուղի բնակիչ, 44-ամյա Էդուարդ Դավթյանի, ինչպես նաև մեկ այլ անձի հետ, որի ընթացքում էլ վիճաբնությունն ավարտվել է ծեծկռտուքով և Ա. Խանդանյանը մարմնական վնասվածքներ է ստացել:
Կայքի տեղեկություններով՝ Ա. Խանդանյանը նշված սրճարանի սեփականատերն է։
