Այսօր՝ ապրիլի 15-ին, Ազգային ժողովում շարունակվում է հերթական նիստի աշխատանքը: Այժմ քննարկվում է Ապօրինի ծագում ունեցող գույքի բռնագանձման մասին օրենքների փաթեթը 2-րդ ընթերցմամբ ընդունելու մասին հարցը:
Անկախ պատգամավոր Արման Բաբաջանյանը արձանագրեց, որ սա հետհեղափոխական Հայաստանի ամենահիմնարար, ամենասկզբունքային օրենքներից մեկն է կամ պետք է լիներ այդպիսին. «Մենք տարիներ, տասնամյակներ շարունակ խոսել ենք Հայաստանում արմատացած հոռի երևույթների, համատարած թալանի, հովանավորչության, համակարգային կոռուպցիայի մասին: Բոլոր այս հանցանքներն ի վերջո առարկայացել են ապօրինի գույքի, առանձնատների, բիզնեսների, կալվածքների և այլ ունեցվածքի տեսքով»:
Նրա խոսքով` քաղաքացիները տեսել են, թե ինչպես է իրենցից թալանվածը դառնում շքեղ առանձնատուն, թանկարժեք ավտոմեքենա կամ եկամտաբեր բիզնես. «Լայն իմաստով հեղափոխությունը տեղի է ունեցել նաև այս անարդարությունը վերականգնելու, քաղաքացիներից թալանվածը քաղաքացուն վերադարձնելու խոստումների և դրանց նկատմամբ մարդկանց հավատի շնորհիվ»:
Նա նշեց` ուստի եթե օրենքը լավը չլինի, առաջ կբերի ժողովրդի հիասթափություն. «Սակայն կարևոր է ոչ միայն լավ շարադրված օրենքը, այլև դրա իմպլեմենտացիայի երաշխիքները: Ահա այստեղ է, որ ես խնդիրներ եմ տեսնում: Ես չեմ տեսնում այս օրենքի կիրառման հստակ ճանապարհային քարտեզը կամ ռազմավարական պլանը, որը մեզ հնարավորություն կտար պատկերացում կազմելու, թե երբ, ինչքան, ինչ միջոցներ են վերադարձվելու պետությանը: Ցավոք, այստեղ մենք բախվում ենք նույն կիսատ-պռատությանը, որն ունենք անցումային արդարադատության, վեթինգի պարագայում»:
Մանրամասները՝ տեսանյութում:
