Այսօր՝ ապրիլի 13-ին, Ազգային ժողովում հրավիրվել է հատուկ նիստ: Օրակարգում հատուկ դրության ռեժիմը երկարաձգելու մասին հարցն է:
Ինչպես նշեց փոխվարչապետ Տիգրան Ավինյանը` արտակարգ դրության ռեժիմը երկարաձգելու պատճառն այն է, որ չեն վերացել այն հիմնական պատճառները, որոնք հիմք են հանդիսացել արտակարգ դրություն հայտարարելու համար:
Նրա խոսքով` կորոնավիրուսի համավարակի դեմ պայքարում չկա բացարձակ արդյունավետ ռազմավարություն. «Հնարավոր չէ այն ամբողջությամբ վերացնել, իսկ դրա դեմ պատվաստանյութի ստեղծումը հնարավոր կլինի ամիսներ անց, եթե ոչ` մեկ տարի անց»:
Նա նշեց, որ հասարակությունները կանգնած են կարևոր երկընտրանքի առաջ` կամ փորձել խուսափել մեծաքանակ զոհերից և դանդաղեցնել վարակի տարածման արագությունը, կամ թույլ տալ վարակի արագ տարածում` մարդկանց մոտ ձևավորելով դիմադրողականություն. «Պետությունների մեծ մասը գնում է առաջին ուղղությամբ` չբացառելով որևէ պահի անցնելու երկրորդ տարբերակին»:
«Հայաստանում 350 հազար մարդ համարվում է ռիսկային խումբ` ըստ տարիքի, անկախ առողջական վիճակից: ՀՀ-ում շաքարային դիաբետ ունեն 77.418 անձ, սրտի իշեմիկ հիվանդություն` 71 հազար 25 քաղաքացի, հիպերտենզիա` 145 հազար 408 քաղաքացի: Ամենառիսկային գոտում են այն մարդիկ, ովքեր ունեն մի քանի խրոնիկ հիվանդություն»,- նշեց Տիգրան Ավիմյանը:
Նրա խոսքով` միջոցառումներ չանելու դեպքում վարակվածների թիվը կհասներ բնակչության 89 տոկոսին, հոսպիտալացված ծանր հիվանդների թիվը` 8200-ի, իսկ Երևանում վարակված կլիներ 110 հազար մարդ:
Ավինյանը ներկայացրեց, թե ինչ միջոցառումներ են կատարվել առաջին երկու փուլերում. «Այժմ գտնվում ենք 3-րդ փուլում, որը առաջարկվում է երկարաձգել մինչև ապրիլի վերջ: Առաջնահերթություն է հայտարարվում վարակի տարածման ինտենսիվությունը կառավարելի պահելը, այսինքն` գործակիցը պետք է լինի 1-ից նվազ: Սահմանափակումները կարող են խստացվել կամ թուլացվել` կախված շաբաթվա դինամիկայից: Ներդրվում է տեղորոշման գործիք, ավելացվում է թեստավորման քանակը»:
Նրա խոսքով` այս պահին հնարավոր է սպասարկել կորոնավիրուսով 1700 մահճակալային հիվանդի:
Ինչպես նշեց Տիգրան Ավինյանը` հանրային և միջմարզային տրանսպորտը շարունակելու է մնալ արգելված:
Մանրամասները՝ տեսանյութում: