«Մենք չենք կարող ասել, որ կորոնավիրուսի տարածումը կանգնում է և 100 տոկոս մարում է»,- երեկ հայտարարեց առողջապահության նախարար Արսեն Թորոսյանը՝ ավելացնելով, որ վիրուսի շրջանառությունը դուրս է եկել վերահսկողությունից. «Առաջ եթե մենք ունենում էինք 50 դեպք մեկ աղբյուրից, ասենք՝ մեկ արտադրամասից, ապա հիմա ունենում ենք 16-20-30 դեպք, բայց 10-20 տարբեր աղբյուրներից»։
Նախարարը նաև նշեց, որ անգամ այս իրավիճակում իրենք շարունակում են նույն գործողությունը՝ թեստավորել, հաստատել, մեկուսացնել շրջանակը, բուժել և արդեն առողջացած դուրս թողնել, և այս գործողությունը կանեն այնքան ժամանակ, քանի դեռ ուժ կա, իսկ եթե տարածվածությունը մեծանա, ապա մեկուսացում այլևս չեն անի և կթողնեն միայն թեստավորումն ու բուժումը։
Նշենք, որ սրան զուգահեռ ապրիլի 10-ից, վարչապետի խոսքով, օրական 1000 թեստ է իրականացվելու։ Նիկոլ Փաշինյանի խոսքով՝ առաջին փուլում հնարավոր է թեստերի թիվը 1000-ի չհասնի, քանի որ տրամաբանական չէ ուղղակի հրավիրել քաղաքացիներին ու թեստավորել։ Դա, վարչապետի խոսքով, կլինի ժամանակի ու ռեսուրսի անիմաստ կորուստ։ Ապրիլի 10-ից, սակայն, բոլոր բուժաշխատողները, թոքաբորբով ու վիրուսային այլ հիվանդություններով քաղաքացիները պարտադիր կթեստավորվեն։
Առողջապահական գործի կազմակերպիչ, Կանադայից Հայաստան վերադարձած Գևորգ Եղյանը «Առաջին լրատվական»-ի հետ զրույցում ասաց, որ օրական 1000 թեստ անելու որոշումը շատ ճիշտ է, քանի որ ինչքան շատ թեստ արվի, այնքան հստակ կլինի պատկերը բնակչության շրջանում վարակի տարածվածության մասով, բայց, Եղյանի խոսքով, թիրախներն է պետք ճիշտ ընտրել։ Այսինքն՝ ոչ թե այդ 1000 թեստն իրականացնել միայն բուժաշխատողների, թոքաբորբով հիվանդների և այլ ախտանշան ունեցողների շրջանում, այլ պատահականության սկզբունքով ընտրված մարդկանց, բնակչության շրջանում, ովքեր ոչ մի ախտանշան գուցեև չունեն:
«Եթե ցանկություն կա ընդհանրապես պարզելու բնակչության վարակվածության աստիճանը, պարզելու տարածման դինամիկան, ապա անհրաժեշտ է պատահականության սկզբունքով ընտրել 370-ի մոտ մարդ, թեստավորել նրանց։ Այդ դեպքում 95 տոկոս ճշգրտությամբ հնարավոր է անել եզրակացություն՝ կապված տարածվածության և դինամիկայի հետ։ Բայց հիմա ընտրվել է տարբերակը թեստեր անելու այն մարդկանց, ովքեր կոնտակտ են ունեցել վարակակրի հետ, բուժաշխատողներին են անելու, բայց դա ընդհանուր պատկեր ունենալու համար բավարար չէ»,- ասաց Եղյանը։
Մասնագետը չի կիսում առողջապահության նախարարի պնդումները, թե եթե այս տեմպը պահպանվի, ապա ապրիլ ամսվա վերջում 3600-ի չափ հիվանդ կունենանք. «Չկա նման բան, մենք նույնիսկ չգիտենք, թե առաջին կոնտակտը մեր բնակչությունը երբ է ունեցել։ Սկսել ենք թեստավորել փետրվարի 28-ից։ Մենք հիմա չենք կարող ասել, որ աճը կպահպանվի։ Ես նույնիսկ հակառակը կարող եմ պնդել։ Ես նույնիսկ վստահ եմ, որ մենք հաղթահարել ենք երկրորդ պիկը։ Վիճակագրորեն հաստատելի տարբերություն չկա՝ դեռ պնդելու, որ վարակի տարածումը կմեծանա։ Դա պետք է վիճակագրորեն հաստատելի լինի, իսկ սրա համար էլ հարկավոր է, որ համատարած, պատահականության սկզբունքով բնակչության շրջանում թեստավորում իրականացվի։ Նման պարագայում 95 տոկոս ճշգրտությամբ կարելի է եզրակացություններ անել»,- եզրափակեց Եղյանը։
