Ադրբեջանական Salam News գործակալության փոխանցմամբ՝ ԵՄ-ը չափազանց հիասթափված է Թորքիայի վարչապետ Ռեջեփ Թայիփ Էրդողանի վերջին սկանդալային հայտարարությունից, որը նա հնչեցրել է այսպես կոչված՝ Հյուսիսային Կիպրոսի թուրքական հանրապետություն (ՀԿԹՀ) այցելելու նախօրեին։
Թուրքիայի գծով ԵՄ-ի զեկուցող Ռիա Օօմեն Ռիուժտենը հայտարարել է, որ եթե Թուրքիան ցանկանում է անդամակցել ԵՄ-ին, ապա պետք է խաղա կանոններով։
Գերմանիայի արտգործնախարարությունն իր հերթին հայտարարել է, որ իրենք ցանկանում են՝ ԵՄ-ին Թուրքիայի անդամակցության քննարկումն անցկացվի պայմանագրի շրջանակներում։
Հունական լրատվամիջոցները Էրդողանի հայտարարությունը որակել են որպես վիրավորական։
Հիշեցնենք՝ Էրդողանը հայտարարել էր, թե Անկարան լիովին կսառեցնի ԵՄ-ի հետ հարաբերությունները, եթե 2012 թվականի ամռանը Կիպրոսի Հանրապետության կողմից ԵՄ նախագահության ստանձնման ժամանակ կիպրական խնդիրը կարգավորված չլինի.
«Վեց ամիս մենք հետևելու ենք իրադարձությունների ընթացքին։ Եթե կիպրական հարցը չկարգավորվի, ապա ԵՄ-ի հետ բոլոր հարաբերությունները կսառեցվեն։ Մենք չենք խոսի մի երկրի հետ, որին չենք ճանաչում»։
Էրդողանը նաև դեմ է արտահայտվել կիպրական հարցի կարգավորման գործընթացում ԵՄ-ի միջամտությանը. «Մենք չենք ճանաչում ԵՄ մասնակցությունը Կիպրոսի հարցում։ ԵՄ-ը փորձում է այդ խնդիրը քաշել իր կողմը։ Իսկ մենք էլ ասում ենք, որ այդ խնդիրն ամբողջովին պետք է լուծվի ՄԱԿ-ի հարթակում»։
