Եվրոպական խոշորագույն Lufthansa ավիաընկերությունը հաշվարկել է կորոնավիրուսի համաճարակի պատճառով կրած ֆինանսական կորուստները: Ըստ գործադիր տնօրեն Քարսթեն Սփորի, դրանք կազմում են ժամում մոտ մեկ միլիոն եվրո, հայտնում է rte.ie-ն:
Ըստ Սփորի հայտարարության, կորոնավիրուսի պանդեմիայի ընթացքում Lufthansa-ն բախվել է ամենամեծ խնդրին՝ իր գոյության առաջին օրից ի վեր: Ամբողջ աշխարհում գործող սահմանափակումների հետևանքով միլիոնավոր մարդիկ հրաժարվել են թռիչքներից և մնացել են տանը՝ դրանով իսկ «ծնկի բերելով ամբողջ ավիացիոն ոլորտը»:
Այժմ Lufthansa-ն, որն ընդգրկում է Eurowings, SWISS, Brussels Airlines և Austrian Airlines դուստր ձեռնարկությունները, օրվա ընթացքում տեղափոխում է ավելի քան երեք հազար ուղևորի, մինչդեռ համաճարակից առաջ միջին ցուցանիշը հասնում էր 350 հազարի:
Սփորը նշել է նաև, որ Lufthansa-ն ճգնաժամի փուլ է մտել մոտ չորս միլիարդ եվրո ֆինանսական պահուստներով: Սակայն, իրավիճակի վատթարացման հետևանքով, ընկերությունը ծախսերը նվազեցնելու համար ձեռնարկել է արմատական միջոցներ: Մասնավորապես, փակել է Germanwings բյուջետային փոխադրողը և ազատվել ընկերության 40 ինքնաթիռից: Արդյունքում, գործազուրկ է դարձել ավելի քան յոթ հազար մարդ:
2019-ին Lufthansa Group ընկերությունը նվաճել է Եվրոպայի ամենապահանջված փոխադրողի տիտղոսը: Անցած տարվա ընթացքում Lufthansa Group-ին պատկանող ավիաընկերություններն ընդհանուր առմամբ իրականացրել են ավելի քան մեկ միլիոն չվերթներ: