Ադրբեջանական Trend լրատվական գործակալությանը տված հարցազրույցի ժամանակ ԵԱՀԿ գլխավոր քարտուղար Լամբերտո Զանիերը հայտարարել է, որ Հարավային Կովկասն ունի կարևոր նշանակություն՝ ԵԱՀԿ-ի ողջ տիրույթի անվտանգության ու կայունության համար.
«Այսօր ԵԱՀԿ-ն տարածաշրջանում ակտիվ է, ինչպես երբևէ։ Կազմակերպությունն Ադրբեջանում ու Հայաստանում աշխատում է տեղական գործունեության միջոցով ներքին բարեփոխումներին աջակցելու համար։ ԵԱՀԿ-ն նախկինի նման պատրաստ է լուրջ օգնություն ցուցաբերել տարածաշրջանի ձգձգվող հակամարտությունների կարգավորմանը՝ համաձայնեցված ձևաչափերի միջոցով՝ ԵԱՀԿ Մինսկի խմբին՝ Ֆրանսիայի, Ռուսաստանի ու ԱՄՆ-ի նախագահությամբ և Ժնևյան ձևաչափին՝ ԵԱՀԿ-ի, ԵՄ-ի ու ՄԱԿ-ի նախագահությամբ։
Մեր արած ամեն բան արվում է մանդատների հիման վրա, կազմակերպության անդամ 56 երկրների կոնսենսուսի հիման վրա։ Դա նշանակում է, որ Հարավային Կովկասի երկրները՝ Հայաստանը, Վրաստանն ու Ադրբեջանը, ոչ միայն մեր ջանքերի «սպառողներ» են, այլև՝ ԵԱՀԿ-ի ողջ տիրույթում անվտանգությանը, բարգավաճմանը և ժողովրդավարացմանն աջակցելուն ուղղված մեր աշխատանքում ներդրում ունեցող կողմեր։
Ոչ վաղ անցյալում ես հանդիպեցի Մինսկի խմբի համանախագահների հետ և հայտնեցի, որ կիսում եմ նրանց այն կարծիքը, որ հիմնարար սկզբունքները պետք է համաձայնեցվեն որպես առաջնահերթ առաջադրանք, որպեսզի կողմերը կարողանան անցում կատարել խնդրի խաղաղ կարգավորման համապարփակ փաստաթղթի մշակմանը։
Ես մեծ հաճույքով այցելել եմ Հայաստան, Վրաստան և Ադրբեջան՝ որպես ԵԱՀԿ-ի տիրույթում Հակամարտությունների կանխարգելման կենտրոնի տնօրեն։ Ես անհամբերությամբ սպասում եմ իմ նոր պաշտոնում տարածաշրջան կատարելիք այցիս, որը տեղի կունենա այն ժամանակ, երբ այդպիսի հնարավորություն կընձեռի իմ ժամանակացույցը։
Ես պատրաստվում եմ իմ ապագա այցերն օգտագործել տարածաշրջանի երկրների ղեկավարության հետ Հարավային Կովկասի անվտանգության ու կայունության հարցում ԵԱՀԿ-ի արդյունավետ ներդրման պահպանման, հնարավոր է՝ հետագա ընդլայնման հարցերի շուրջ քննարկման համար»։
Հիշեցնենք, որ Լամբերտո Զանիերը ԵԱՀԿ-ի նոր գլխավոր քարտուղար է ընտրվել հունիսի 30-ին՝ այդ պաշտոնում փոխարինելով Մարկ Պերեն դե Բրիշամբոյին։