Սփյուռքահայ հայտնի դերասանուհի Նորա Արմանին, որն այս օրերին «Ոսկե ծիրան» միջազգային փառատոնի շրջանակներում Հայաստանում է, այսօր լրագրողների հետ հանդիպման ժամանակ նշեց, որ «Ոսկե ծիրանը» կարող է միջազգային ցանկացած փառատոնի հետ համեմատվել: Նա ասաց, որ փառատոնում իրեն ամենից շատ դուր է եկել ֆիլմերի բազմազանությունը և այժմեականությունը:
Նորա Արմանիի խոսքերով՝ փառատոնը տարեցտարի կազմակերպչական առումով առաջընթաց է գրանցում, իսկ փառատոնի 10-ամյակին ավելի կընդլայնի իր շրջանակները: Անդրադառնալով հայկական կինոյի արդի վիճակին՝ դերասանուհին ասաց, որ առաջնային խնդիրը ֆինանսական միջոցներն են, որոնց շնորհիվ հնարավոր կլինի նաև օտարազգի ֆիլմարտադրողների ուշադրությունը գրավել դեպի հայկական կինո: Դրա համար, ըստ նրա, պետք է մեծահարուստները, ովքեր որևէ տարածք են ձեռք բերում շինարարական աշխատանքներ իրականացնելու համար, նախապես խոստանան, որ իրենց եկամուտի որոշակի տոկոս կներդնեն մշակույթի զարգացման համար: Դերասանուհին անձամբ պատրաստ է Երևանի քաղաքապետին ներկայացնել իր առաջարկը:
Խոսելով իր առաջիկա ծրագրերից՝ դերասանուհին ասաց, որ մի ծրագիր կիրականացնի Հայաստանում, մյուսը՝ Կալիֆոռնիայում: Հայաստանում նկարահանվող Ֆիլմի գաղափարը Գնել Նալբանդյանինն է. օտարազգի մեկը գալիս է Հայաստան և վերափոխված մեկնում աստեղից: Նա նաև ասաց, որ Երևանը շատ է փոխվել, կարծես եվրոպական երկիր լինի, որը չի հիշեցնում 1991-1993 թվականները, հայերն էլ կարծես իտալացիներ լինեն:
Նորա Արմանին պատրաստվում է գիրք գրել՝ Ցեղասպանության 100-երորդ տարելիցին նվիրված, որում պատմելու է իր գերդաստանի՝ Ցեղասպանության հետևանքով աշխարհի տարբեր երկրներում հաստատված անդամների մասին:
Խոսելով դրսում կատարած աշխատանքներից՝ դերասանուհին ասաց, որ այս պահին նկարահանվում է Զաք Ջոհենսանի «Ձյուն է գալիս» (ֆիլմի նախնական անվանումը) ֆիլմում, որում խաղում է հետախուզվող փաստաբանի դեր, Նյու Յորքում բեմադրում է նաև մի շարք թատերական աշխատանքներ:
