Նախկին 24 բարձրաստիճան դիվանագետներ և պաշտպանության գերատեչությունների պաշտոնյաներ կոչ են արել ԱՄՆ նախագահ Դոնալդ Թրամփին փրկել հարյուր հազարավոր կյանքեր Մերձավոր Արևելքում՝ մեղմելով պատժամիջոցները, որոնք խոչընդոտում են մարդասիրական օգնության և դեղամիջոցների առաքմանը Իրան, հաղորդում է The Guardian-ը:
Նրանք նման կոչ են արել կորոնավիրուսի համաճարակի ֆոնին, որի պատճառով Իրանում ավելի քան 3.7 հազար մարդ է մահացել:
Նրանք չեն պնդում ամբողջովին վերացնել ամերիկյան պատժամիջոցները, բայց կոչ են անում թուլացնել ԱՄՆ-ի սահմանափակումները, որոնք թույլ չեն տալիս Թեհրանին ձեռք բերել բժշկական և հումանիտար ապրանքներ: Նրանք պնդում են, որ այդ քայլը «կարող է փրկել հարյուր հազարավոր շարքային իրանցիների կյանքը և, կանխելով վիրուսի արագ տարածումը երկրի սահմաններից դուրս՝ հարևանների, եվրոպացիների, ամերիկացիների և այլ մարդկանց կյանքը»:
Կոչին միաց ել են մասնավորապես ԵՄ-ի նախկին արտգործնախարար Ֆեդերիկա Մոգերինին, ԱՀԿ նախկին գլխավոր տնօրեն Գրու Հարլեմ Բրունդթլանդը, ԱՄՆ նախկին պետքարտուղար Մադլեն Օլբրայթը, ԱՄՆ նախկին պաշտպանության նախարարներ Ուիլյամ Քոենը և Չաք Հեյգելը, ՄԱԳԱՏԷ-ի նախկին տնօրեն Հանս Բլիքսը և ՆԱՏՕ-ի նախկին գլխավոր քարտուղար Ջորջ Ռոբերթսոնը:
Նրանք հորդորում են Թրամփին չօգտագործել ԱՄՆ-ի ձայնի իրավունքը Արժույթի միջազգային հիմնադրամի տնօրենների խորհրդում, ԱՄՀ-ից Իրանի 5 միլիարդ դոլարի չափով վարկի ստացումը խոչընդոտելու համար, ինչպես նաև հայտարարություն հրապարակել՝ ի աջակցություն Մեծ Բրիտանիայի, Ֆրանսիայի և Գերմանիայի կողմից ստեղծված Instex առևտրային մեխանիզմի օգտագործման: