Իրանում մեկ օրվա ընթացքում կորոնավիրուսով վարակվածների թիվն ավելացել է 3111-ով՝ ընդհանուր թիվը հասցնելով 44 606-ի։ Մահացածների թիվն ավելացել է 141-ով, ընդհանուր՝ 2898 մահ։ Այդ մասին «Առաջին լրատվական»-ի հետ զրույցում ասաց Թեհրանի «Արաքս» շաբաթաթերթի խմբագիր Մովսես Քեշիշյանը։ Նա նշեց, որ կորոնավիրուսը մինչ այս պահը 11 իրանահայի կյանք է խլել, վերջին երկուսը տղամարդ են՝ 60 և 62 տարեկան։
Իրանում մեկ օրվա ընթացքում բուժվել է 745 քաղաքացի, ընդհանուր առողջացածների թիվը 14656 է։ Մովսես Քեշիշյանի խոսքերով՝ մահացածներից երեքը տարիներ շարունակ տառապել են խրոնիկ այլ հիվանդություններով։
«Նոր տվյալները հաշվի առնելով՝ մինչ այժմ փաստացիորեն մահացածներից 7-ի մոտ կորոնավիրուսի թեստի պատասխանը եղել է դրական, իսկ կասկածելի են համարվել 4-ը: Ինչպես տեղեկացրել էինք սրանից առաջ, մահացածներից մեկը եղել է 94 տարեկան կին, մյուսները՝ 83-ամյա կին, 80-ամյա տղամարդ, հինգը՝ 65-75 տարեկան, մեկը կին է, չորսը՝ տղամարդ, և մեկ 57-ամյա տղամարդ։ Առողջապահության հրամայականից ելնելով, բոլոր հանգուցյալները թաղվել են պրոտոկոլային նորմերը հաշվի առնելով»,- ասաց նա։
Հարցին՝ արդյոք վարակի տարածումն իր պիկի՞ն է հասել, նա նշեց, որ այս պահին ոչ ոք չի կարող պատասխանել այս հարցին, որովհետև դա կախված է բոլոր առողջապահական նորմերը հարգելու և տեղաշարժերը դադարեցնելու հետ, ինչը, դժբախտաբար, ամբողջությամբ չի իրականացվում:
«Մնում է միայն հուսալ, որ դեպի լավը կգնանք։ Իրանի որոշ քաղաքներում նահանջի միտումը զգալի է, բայց մեծ քաղաքների և հատկապես Թեհրանի մասին դա չի կարելի ասել»,- հավելեց Քեշիշյանը: