American Airlines ավիաընկերությունը պատվիրել է 460 ինքնաթիռ աշխարհի երկու ամենախոշոր ավիաշինական ընկերություններին՝ Airbus-ին և Boeing-ին: Ավիաընկերության տարածած հաղորդագրության մեջ ասվում է, որ սա պատմության ընթացքում ամենախոշոր գործարքն է, սակայն գործարքի գումարը չի նշվում:
Պատվիրվել է 200 Boeing 737 և 260 Airbus A320 ինքնաթիռներ: Ինքնաթիռների առաքումները նախատեսվում են 2013-2022 թթ.: Բացի այդ, կա նաև տարբերակ, որ ավիաընկերությունը կպատվիրի լրացուցիչ 465 ինքնաթիռներ մինչև 2025 թ.-ը:
Տեղեկացնենք, որ American Airlines ավիաընկերությունը համարվում է աշխարհի ամենախոշոր ավիաընկերություններից մեկը և մտնում է ԱՄՆ ուղևորափոխադրողների եռյակի մեջ: Այս տեղեկությունն, ըստ Associated Press գործակալության, դրական լիցքեր կհաղորդի ներդրողներին, քանի որ ֆինանսական երկրորդ եռամսյակի տվյալներով ընկերության կորուստները կազմել են 286 միլիոն դոլար, ինչը պայմանավորված է վառելիքի բարձր գներով: