Թուրքական Radikal թերթի հաղորդմամբ՝ Թուրքիայում ահաբեկչական հռչակված և արգելված Քրդստանի աշխատավորական կուսակցության (PKK) հիմնադիր, 1999 թվականից Մարմարա ծովի Իմրալը կղզում ցմահ ազատազրկում կրող քուրդ առաջնորդ Աբդուլլահ Օջալանն իր փաստաբանների միջոցով հերթական հայտարարությունն է տարածել.
«Օրեր առաջ Դիարբեքիրի Սիլվան շրջանում PKK-ի կողմից 13 թուրք զինծառայողի սպանությունից հետո (վիրավորվել էր նաև 7 թուրք զինծառայող) ինձ մոտ եկան իշխանության ներկայացուցիչները և ասացին՝ միայն Դուք եք ի վիճակի զինաթափել PKK-ի զինյալներին, միայն Դուք կարող եք լուծել այդ հարցը։
Սակայն ես նրանց պատասխանեցի, որ իմ ձեռքում չկա կախարդական փայտիկ կամ Ալադինի կախարդական լամպը, և կապ չունի՝ ես այստեղ եմ, թե դրսում։ Անհրաժեշտ են գործնական միջոցներ։ Եթե իմ ձեռքում չկան այդ գործնական միջոցները, ապա ինչպե՞ս ես կարող եմ հարցը լուծել։
Մենք հավատում ենք, որ այս հարցը չի կարող լուծվել զենքի միջոցով։ Այս հարցը պետք է լուծվի ժողովրդավարական, սահմանադրական մեթոդներով։ Նորից կրկնում եմ՝ եթե իշխանությունները ցանկանում են, որ ես դերակատարություն ունենամ այս խնդրի լուծման մեջ, ապա անհրաժեշտ է դրա համար պայմաններ ապահովել։
Ես աջ ու ձախ էլ նետվեմ, ինչ էլ որ անեմ, ոչինչ չեմ կարող փոխել։ Անհրաժեշտ է ինձ հատկացնել խնդրի ժողովրդավարական լուծման միջոցներ։
Ես ցանկանում եմ, որ շարունակվի կառավարության ու քրդական «Խաղաղություն և ժողովրդավարություն» կուսակցության (ԽԺԿ) միջև բանակցային գործընթացը։ Անհրաժեշտ է համաձայնության հասնել։ Մեջլիս վերադառնալու համար պետք է հասնել փոխահամաձայնության։ Հաթիփ Դիջլեի հարցը լուծելու համար Դիարբեքիրում պետք է անցկացնել միջանկյալ ընտրություններ»։
Հիշեցնենք, որ 1978 թվականին Օջալանի հիմնադրած PKK-ի ընդլայնված զինված պայքարը Թուրքիայում սկսվել է 1984 թվականին, ինչի արդյունքում երկու կողմից զոհվել է 40-45,000 մարդ:
