Համաշխարհային բանկի խմբի անդամ Միջազգային ֆինանսական կորպորացիան (IFC) կազմակերպել է դասընթաց բանկային համակարգի աշխատակիցների համար՝ ռիսկերի կառավարման հմտությունները բարելավելու նպատակով, որը հատկապես կարևորվում է բանկային ոլորտի կայունացման ու արդյունավետության բարձրացման համար: Վերջինս կաջակցի տնտեսությանը՝ հաղթահարելու ֆինանսական ճգնաժամի բացասական հետևանքները:
IFC լրատվական ծառայությունից «Առաջին լրատվական»-ին հայտնում են, որ դասընթացը կայացել է հուլիսի 18-19-ը Երևանում, ներկայացվել են միջազգային բանկային համակարգի զարգացման միտումները: Դասընթացը հիմնականում նվիրված էր այն ֆինանսական գործիքների ներկայացմանը, որոնք կարող են նվազեցնել իրացվելիության ռիսկը։ Սա կարող է առաջ գալ այնպիսի դեպքերում, ինչպիսիք են վարկային ռեյտինգների իջեցումը կամ կանխիկ դրամի անկանխատեսելի արտահոսքը։ Առաջատար բանկերի և ունիվերսալ վարկային կազմակերպությունների ավելի քան քսան աշխատակիցներ մասնակցել են դասընթացին:
«Դասընթացն աջակցեց մասնակիցներին ավելի հստակ ըմբռնել իրացվելիության ռիսկի ազդեցությունը բանկային գործընթացների վրա։ Բանկային ոլորտի աշխատակիցները ձեռք բերեցին գիտելիքներ, որոնք կարող են կիրառվել բանկերում՝ ապագայում ռիսկերը կանխելու և մեղմելու համար»,- ասել է IFC-ի կովկասյան տարածաշրջանի ղեկավար Թոմաս Լյուբեքը:
Դասընթացը կազմակերպվել է IFC-ի Եվրոպայում և Կենտրոնական Ասիայում իրականացվող ֆինանսական ոլորտի հակաճգնաժամային ծրագրի շրջանակներում, որն իրականացվում է Ավստրիայի զարգացման բանկի հետ համագործակցության շնորհիվ:
