Աշխարհի խոշորագույն բուքմեյքերական գրասենյակներից William Hill-ը հրապարակել է մամլո հաղորդագրություն, որում ասվում է, որ ընկերությունը սկսել է խաղադրույքներ ընդունել Մեծ Բրիտանիայի վարչապետ Դևիդ Քեմերոնի հրաժարականի համար, ինչը կարող է լինել արդեն եկող երկուշաբթի:
Ընկերության ներկայացուցիչն ասել է, որ «գաղտնալսումների հետ կապված սկանդալն արդեն մի քանի մարդկանց հրաժարականի առիթ է հանդիսացել, և հավանականություն կա, որ «կթռնի նաև վարչապետի գլուխը»: Հիշեցնենք, որ մեդիամագնատ Ռուփերթ Մերդոքի լրատվամիջոցների կողմից իրականացված գաղտնալսումների պատճառով իրենց պաշտոններից հրաժարական են տվել Մեծ Բրիտանիայի գլխավոր ոստիկանապետ Փոլ Սթիվենսոնը և Լոնդոնի փոխստիկանապետ Ջոն Յեյթսը:
Բուքմեյքերները կարծում են, որ քիչ հավանական է, թե վարչապետը հեռանա` դրա համար սահմանելով 1:16 խաղադրույք: Որպես վերջնաժամկետ է նշվում հուլիսի 24-ը: Ընդ որում, խաղադրույքներ են ընդունվում նաև այն բանի համար, թե ով կփոխարինի վարչապետին: Ամենահավանական թեկնածու է համարվում Լոնդոնի քաղաքապետ Բորիս Ջոնսոնը, որի շանսերը գնահատվում են 4:1-ի: