Վարչապետ Նիկոլ Փաշինյանը աշխատանքային այց է կատարում Բրյուսել, և այն, որ այցը կատարվում է սահմանադրական հանրաքվեի քարոզարշավի աշխուժացող գործընթացի ժամանակահատվածում, խոսում է թերևս այցի կարևորության մասին: Հայտնի է նաև, որ վարչապետ Փաշինյանը մարտի 10-ից արձակուրդ է վերցնում և ձեռնամուխ է լինելու աշխույժ քարոզչությանը: Դա էլ իր հերթին նշանակում է, որ Բրյուսել այցը ըստ երևույթին ունի «սլաքները ճշգրտելու» նպատակ: Թե հատկապես ինչ սլաքների մասին է խոսքը՝ հավանաբար առավել հստակ կլինի արդեն այցի մանրամասների ի հայտ գալուց հետո:
Վարչապետը հանդիպելու է ԵԽ նախագահի, ԵՄ արտաքին հարաբերությունների և անվտանգության հարցերի հանձնակատարի, նաև ԵԺԿ նախագահ Դոնալդ Տուսկի հետ: Ի դեպ, հատկանշական է, որ 2019-ի ամռանը Տուսկը դեռևս ԵԽ նախագահի կարգավիճակում ռեգիոնալ այցի շրջանակում Հայաստանում հանդիպում էր ունեցել վարչապետ Փաշինյանի հետ: Եվ մեկ այլ հատկանշական հանգամանք է, որ օրերս Դոնալդ Տուսկի հետ հանդիպել է նաև Սերժ Սարգսյանը՝ ՀՀԿ նախագահի կարգավիճակով: Հայտնի է, որ ՀՀԿ-ն ԵԺԿ անդամ է, և Սերժ Սարգսյանը՝ փաստորեն ԵԺԿ անդամ կուսակցության նախագահ: Իր Բրյուսել կատարած այցի ընթացքում Սարգսյանը հանդիպել էր Տուսկի հետ և խոսել Հայաստանի ներքին հարցերի մասին:
Հետաքրքիր է, որ «Քաղաքացիական պայմանագիրը» ԵԺԿ անդամ չէ, և այդ հանգամանքը առավել ուշագրավ է դարձնում Բրյուսել աշխատանքային այցի ընթացքում Նիկոլ Փաշինյանի հանդիպումը Դոնալդ Տուսկի հետ, ինչի մասին հայտնում է այցի ծրագրի մասին պաշտոնական հաղորդագրությունը: Արդյոք Փաշինյանը Տուսկի հետ քննարկելո՞ւ է ՔՊ անդամակցությունը ԵԺԿ-ին՝ Եվրոպայի խորհրդի, Եվրախորհրդարանի ամենամեծ և ազդեցիկ կուսակցությանը: Արդյոք կառավարող մեծամասնությունը ձեռնամո՞ւխ է լինում ԵԺԿ-ի հետ այդպիսի օրակարգ ձևավորելուն:
Եթե ոչ, ապա ինչո՞վ է պայմանավորված հանդիպումը, երբ Տուսկը փաստորեն ԵՄ կամ ԵԽ բարձրաստիճան պաշտոնյա չէ, թեև իհարկե քաղաքական իմաստով ընդհանուր առմամբ հասկանալի է, որ խոսքը ազդեցիկ քաղաքական միավորի ղեկավարի մասին է: Այդուհանդերձ, թե՞ վարչապետի ու Տուսկի հանդիպումը պայմանավորված է նրա ԵԽ նախագահ եղած շրջանի օրակարգի որևէ շարունակությամբ:
Եվ վերջապես՝ արդյոք դա կարո՞ղ էր պայմանավորված լինել Սերժ Սարգսյանի այցով ու ԵԺԿ նախագահի հետ հանդիպումով: Բայց այդ դեպքում իհարկե պետք է նկատել, որ Սարգսյանը կարող է պարբերաբար այցելել ԵԺԿ, հազիվ թե ամեն այցից հետո վարչապետ Փաշինյանը պետք է ստիպված լինի մեկնել նրա հետևից:
Մյուս կողմից՝ այստեղ էլ կարող է լինել ԵԺԿ անդամակցության հնարավորության հետ կապված «ինտրիգը», որն առայժմ իհարկե լոկ մեր ենթադրության մակարդակում է, որովհետև որևէ կերպ ԵԺԿ-ին ՔՊ հնարավոր անդամակցության հարցը դեռևս չի եղել հանրային տիրույթում: