Արմավիրի մարզի Գայ գյուղի բնակիչների և «Հայաստանի էլեկտրական ցանցեր» ընկերության միջև էլեկտրաէներգիայի հսկայական «պարտքերի» խնդիրը վաղը կլինի Ռոբերտ Նազարյանի գլխավորած Հանրային ծառայությունները կարգավորող հանձնաժողովի (ՀԾԿՀ) ուշադրության կենտրոնում:
Հանձնաժողովի աշխատակազմը որպես վեճի լուծման միջոց նախատեսում է որոշում ընդունել, որում առաջարկում է սահմանել, որ եթե սպառողն ընդունում է իր պարտքը, ապա պետք է կազմվի պարտքի մարման ժամանակացույց՝ ոչ պակաս 3 տարի մարման ժամկետով, քանի որ խոսքը 2002-2009թթ. իբրև թե կուտակված պարտքերի մասին է և միանգամից այդ պարտքերի վճարումը բաժանորդի համար կարող է բավականին դժվար լինել: Սակայն ողջ խնդիրն այն է, որ բնակիչները ժամանակին և պարտաճանաչորեն վճարել են ամեն ամսվա էլեկտրաէներգիայի վարձը, հակառակ պարագայում, անգամ 100-500 դրամ պարտքի համար հոսանքազրկվել են:
Այս տարվա ապրիլին ՀԷՑ-ը բաժանորդներին ծանուցումներ է ուղարկել, առանց ամսաթվերի, որոնց վրա նշվել է պարտքի գումարը՝ 50 հազարից մինչև 100 հազար և ավելի դրամ, և նախազգուշացում, որ եթե 5 օրում չվճարեն այդ գումարները, ապա կհոսանքազրկվեն: Գյուղի պարտքի ընդհանուր ծավալն, ըստ ՀԷՑ-ի, 40 մլն դրամ է:
ՀԾԿՀ-ի համաձայն` երկրորդ դեպքում, երբ բաժանորդը չի ընդունում այդ պարտքը, մատակարարն այն պետք է ապացուցի դատական կարգով: Հանձնաժողովը չի բացառում նաև, որ մատակարարն ու բաժանորդը կարող են ավելի նպաստավոր համաձայնության գալ, օրինակ` բաժանորդը պատրաստ է վճարել, եթե ՀԷՑ-ը պարտքի որոշ մասը զիջի, կամ 3 տարվա փոխարեն 4 տարում համաձայնեն մարել: «Առաջին լրատվականի» հետ զրույցում ՀԾԿՀ Լիցենզավորված գործունեության մոնիտորինգի և ներդրումային ծրագրերի վարչության պետ Աբգար Բուդաղյանը նշեց, որ, ըստ որոշման նախագծի, քանի դեռ վեճը չի լուծվել, մատակարարը բաժանորդի էլեկտրամատակարարումը իրավունք չունի դադարեցնել:
Գայ գյուղի բնակիչները կտրականապես հերքում են պարտքի կուտակման հնարավորությունը: Նրանք բողոքի մի քանի ակցիաներ անցկացրեցին, որից հետո էներգետիկայի և բնական պաշարների նախարարի կարգադրությամբ հանձնաժողով էր ստեղծվել, որը պետք է պարզեր իրողությունը:
Ի դեպ, ՀԾԿՀ որոշումը բաժանորդների համար պարտադիր բնույթ չի կրում, և նրանք ազատ են դիմելու դատարան: Արդեն առնվազն 4 ընտանիքների հայցերը դատարանում են: Եթե հաշվի առնենք, որ գոյություն ունի նաև հայցի վաղեմության խնդիր, ըստ որի 3 տարուց ավելի առաջ կուտակված պարտքերը բնակիչներն իրավասու են չվճարել, ապա, ենթադրվում է, որ ՀՀ արդար դատարանները պետք է հօգուտ բնակիչների որոշում կայացնեն: Ավելին` բնակիչներից շատերը պահպանել են անդորրագրերը, սակայն ՀԷՑ-ը պնդում է, թե պարտքերը կուտակվել են հաշվիչները փոխելու ժամանակ:
Մեզ հետ զրույցում ԱԺ «Ժառանգություն» խմբակցության պատգամավոր Անահիտ Բախշյանը տարակուսեց, թե ե՞րբ է կուտակվել պարտքը, որ մարդիկ տեղյակ չեն եղել. «Որտե՞ղ է դա ամրագրված, ինչպե՞ս են հաշվել: Առանց մարդկանց տեղյակ պահելու հաշվիչը հանել-տարել են: Մարդիկ իրենց այդ պարտքի տերը չեն համարում»:
Պատգամավորը հայտնեց, որ իրենց ուղղված էներգետիկայի և բնական պաշարների նախարարի պատասխան նամակում ասված է, որ տարիներ շարունակ Գայ գյուղում հաշվիչները դնելիս թույլ են տրվել բազմաթիվ սխալներ, գործընթացները ճիշտ չեն փաստագրել, փաստթղթերը ժամանակին ճիշտ չեն կազմել: Պատգամավորը վստահ է, որ հենց այդ ժամանակ էլ նկարվել են «պարտքերի» թվերը:
Գայի բնակիչների պահանջը շարունակում է նույնը մնալ՝ ջնջել հորինված պարտքերը:
