Երեկվանից մեկնարկել է մարտի 31-ին Արցախում սպասվող խորհրդարանական և նախագահական ընտրությունների քարոզարշավը։ Այն խոստանում է լինել հետաքրքիր՝ նախ, որ կա մեծ մրցակցություն, այս պահի դրությամբ՝ նախագահի 14 թեկնածու, և, ըստ փորձագետների, առաջին անգամ է, որ չկա պաշտոնական Երևանի թելադրանք կամ ինչպես նախորդ ընտրություններին է եղել՝ «նշանակում»։
Արցախցի իրավապաշտպան Կարեն Օհանջանյանը «Առաջին լրատվական»-ի հետ զրույցում ասաց՝ կանխատեսում է, որ այս շրջանը բավականին լարված կանցնի. «Հաշվի առնելով այն փաստը, որ այժմյան ընտրություններն ու ընտրարշավը տարբերվում են նախորդներից, և նաև այն փաստը, որ հիմնական թեկնածուները դեռ մինչև պաշտոնական ընտրարշավը սկսել էին ընտրողներին ակտիվորեն ներկայացնել իրենց ծրագրերը Արցախի ապագայի վերաբերյալ, կարող ենք ասել, որ Արցախի ընտրողների մեծ մասին արդեն ծանոթ է թեկնածուներից ու կուսակցություններից շատերի կոնցեպցիան, և շատերն արդեն իսկ հստակ նախասիրություններն ունեն»։
Այդուհանդերձ, մեր զրուցակիցն ընդգծեց՝ ընտրարշավը կլինի պայքար այն մարդկանց ձայների համար, որոնք դեռ չեն կողմնորոշվել։ Մեր դիտարկմանը, թե հնարավո՞ր է երկրորդ փուլ լինի, Օհանջանյանը բացասական պատասխան տվեց՝ շեշտելով, որ իր ուսումնասիրությունները այլ բան են ասում. «Կարծում եմ, որ հենց առաջին փուլում էլ Արայիկ Հարությունյանը վստահ հաղթանակ կտանի, որը շատ մյուս թեկնածուների համեմատ ունի հստակ ծրագիր, ինչը հաղթանակի դեպքում մտադիր է կյանքի կոչել։ Այն լուրջ վստահություն է ներշնչում և մոտ ապագայում կապահովի երկրի տնտեսական ու սոցիալական անվտանգությունը։ Իսկ դա հիմա ընտրողներին ամենաշատն է մտահոգում»։
Քաղաքագետ Լևոն Շիրինյանն ակտիվորեն հետևում է Արցախում ընթացող ներքաղաքական զարգացումներին։ Նա համարում է, որ սպասվող ընտրություններն Արցախի համար կարևորագույն իրադարձություն են։ Իսկ այս ընթացքը, ըստ մեր զրուցակցի, կարևոր է թե՛ ներքին և թե՛ արտաքին իմաստով: «Արտաքին իմաստով հետևյալն է. պետք է դադարել խոսել զույգ հայկական պետությունների մասին. Արցախը Հայաստանի մասն է։ Կա՛մ պետք է հայտարարեն ուղիղ միացման մասին, կա՛մ, եթե չեն ուզում շատ ցնցում լինի, ֆեդերալ պետության ճանապարհով գնան։ Այսինքն՝ Արցախն ընդունում է Հայաստանի Հանրապետության գերակայությունը և դադարում խոսել երկու հայկական առանձին պետությունների մասին»,- «Առաջին լրատվական»-ի հետ զրույցում ասաց նա։
Ինչ վերաբերում է ներքին նշանակությանը, Շիրինյանն ընդգծեց. «Ինչ ուզում է լինի՝ ռեժիմի վերարտադրությունը պետք է բացառվի։ Սերժի ու Ռոբերտի շունչը պետք է բացառվի մեկընդմիշտ։ Հիմա լավ խոսակցություն է սկսվել՝ Արցախի ընդերքի ազգայնացում։ Ամեն թեկնածու իրեն կներկայացնի, ու ժողովուրդը կընտրի։ Ես պետք է հետևյալ կոչն անեմ՝ բացառեն կլան, սիրուհի, հորեղբոր տղա, կնոջ սիրած հասկացությունները… Ինձ համար ցանկալի է, որ նոր դեմքեր դուրս գան, զզվել ենք կիսագրագետ խոսակցություններից։ Հետո մի խնդիր կա՝ մարդը, ով Հայաստանում լավ է ներկայացված, Արցախում բնավ ճանաչելի չէ, մինչդեռ պետք է հակառակը լիներ»։
