Փետրվարի 26-ից կմեկնարկի մարտի 31-ին սպասվող Արցախի խորհրդարանական և նախագահական ընտրությունների քարոզարշավը։ Այն խոստանում է լինել հետաքրքիր և աննախադեպ՝ այն իմաստով, որ կա չափազանց մեծ մրցակցություն, և որ, ամենակարևորն է, փորձագետների կարծիքով՝ առաջին անգամ է, որ ընտրությունների ելքը նախապես կանխորոշված և թելադրված չէ Երևանի իշխանությունների կողմից։
Թեպետ, որոշ դիտարկումներով, հաղթելու ամենամեծ հնարավորությունն ունի Արցախի նախկին վարչապետ Արայիկ Հարությունյանը՝ հաշվի առնելով մարդկային ու ֆինանսական ռեսուրսները, վերջերս տեղի ունեցած որոշ վերադասավորումներ հնարավոր է փոխեն իրադարձությունների զարգացման ընթացքը։ Խոսքը մասնավորապես ՊԲ նախկին հրամանատար Սամվել Բաբայանի՝ Արցախի ԱԳ նախարար Մասիս Մայիլյանին աջակցելու որոշման մասին է։ Ի դեպ, որոշ տեղեկություններով՝ այս որոշումն այնքան էլ չեն ողջունել Մայիլյանի աջակիցները, որոնք համարում են, որ Մայիլյանը պետք է նոր Արցախի խորհրդանիշ լիներ և ոչ թե աջակցություն ստանար հին համակարգի ներկայացուցչի կողմից։ Այդուհանդերձ, իրադարձությունների զարգացման այս սցենարով մասնագետները չեն բացառում երկրորդ փուլը։ Ինքը Մայիլյանն էլ հայտարարում է՝ եթե լինի երկրորդ փուլ, ինքն իր տեղն այնտեղ ունի։
Քաղաքական մեկնաբան Հակոբ Բադալյանի կարծիքով՝ քանի որ ներքին հանրային տրամադրությունները հայտնի չեն, դժվար է այս պահին հայտարարել, թե քանի փուլով կավարտվեն ընտրությունները։ Մեր զրուցակիցն այդուհանդերձ նշեց. «Երկրորդ փուլի մեծ հավանականության մասին խոսելու հիմքը հավանաբար թեկնածուների առատությունն է ու որոշակիորեն նաև այն իրավիճակը, որ փաստացի առաջին անգամ Արցախում հանրությունը ոչ թե ինչ-որ «մատուցված թեկնածուի» օգտին է քվեարկելու, այլ ընտրելու է մրցակցող թեկնածուների միջև։ Այս աննախադեպ իրավիճակը թույլ է տալիս խոսել երկրորդ փուլի մեծ հավանականության մասին, բայց դա չի նշանակում, որ բացառելի է առաջին փուլով ինչ-որ արդյունք։ Դա կախված է լինելու նախընտրական աշխատանքից, որ կտանեն թեկնածուները, այսինքն՝ թեկնածուն ինչքանով արդյունավետ կաշխատի ընտրողի հետ»։
Մեր զրուցակիցը կարծում է, որ քարոզարշավը մեծ նշանակություն է ունենալու: «Այստեղ երկու կարևոր ասպեկտ կա։ Նախ առաջինը՝ յուրաքանչյուր թեկնածու ընտրողի հետ իր աշխատանքն է տանելու, իր ծրագիրն է ներկայացնելու ու, ըստ այդմ, պետք է փորձի վստահություն շահել։ Եվ երկրորդ կարևոր ասպեկտը՝ ընդհանրապես ընտրողին հասցնել այն իրավիճակի աննախադեպությունը, որ այժմ ձևավորված է։ Այսինքն՝ ընտրության իրապես մրցակցային բնույթը։ Սա, իհարկե, չի խոսում այն մասին, որ կա իդեալական պատկեր այդ մրցակցության տեսանկյունից։
Թեկնածուներից մեկն, օրինակ, շրջանառում է ֆինանսական միջոցների ներգրավվածության հանգամանքը, խոսվում է նաև այլ միջամտությունների մասին։ Սրա պատասխանը պետք է տան նաև դրա համար պատասխանատու կառույցները, որոնք պետք է ապահովեն ընտրության օրինականությունը։ Բայց այս ամենով հանդերձ՝ թեկնածուները պետք է ընտրողին հասցնեն նաև քվեարկելու կարևորությունը։ Այսինքն՝ հասցնեն այն միտքը, որ հենց ընտրողի քվեարկությունն է որոշելու, թե ինչպիսի արդյունք է գրանցվելու»,- եզրափակեց Հ. Բադալյանը։
ՄԱՀՀԻ փորձագետ Արմեն Վարդանյանի կարծիքով՝ թեկնածուների այսօրինակ առատության պայմաններում երկրորդ փուլն անխուսափելի է: «Ըստ իս՝ թեկնածուներից որևէ մեկը չունի ակնհայտ առավելություն, որ առաջին փուլում 50 տոկոսից ավելի ձայն ստանա, ուստի երկորդ փուլն անխուսափելի է»,- «Առաջին լրատվական»-ի հետ զրույցում ասաց նա։
Վարդանյանի դիտարկմամբ՝ ֆավորիտ թեկնածուները մի քանիսն են՝ նախկին վարչապետ Արայիկ Հարությունյան, ԱԳ նախարար Մասիս Մայիլյան, նաև՝ Դաշնակցության թեկնածուն, քանի որ ՀՅԴ-ն Արցախում հզոր կառույց ունի. «Ինչ-որ առումով ֆավորիտ է նաև Վիտալի Բալասանյանը, իսկ ինչ վերաբերում է ՀՅԴ թեկնածուին, չեմ ասում, որ առաջին, երկրորդ տեղում կարող է նա լինել, բայց երրորդ, չորրորդ տեղին կարող է հավակնել՝ նշածս պատճառով»։
Արմեն Վարդանյանը կիսում է Հակոբ Բադալյանի մոտեցումը այն հարցում, որ քարոզարշավը շատ բան կարող է փոխել. «Ուժերի դասավորությունն էլ կարող է փոխվել, որովհետև Արցախում անընդհատ տարբեր քաղաքական կոնֆիգուրացիաներ են լինում, տարբեր ուժեր հայտարարում են այս կամ այն գործչին սատարելու մասին»։