2020 թվականի մարտի 31-ին Արցախում սպասվում են համապետական ընտրություններ․ ընտրելու են նախագահ և ձևավորելու են Ազգային ժողով։
Ի՞նչ տրամաբանությամբ են անցնելու ընտրություններն Արցախում․ այստեղ էլ է գործելո՞ւ Հայաստանի օրինակը, թե՞ Արցախում այլ սկզբունք է գործելու․ «Առաջին լրատվական»-ի հարցին Արցախի պահպանողական կուսակցության նախագահ, արցախի նախագահի թեկնածու Դավիթ Բաբայանը պատասխանեց․ «Գիտե՛ք, տարբերություն կա այս երկու ընտրությունների միջև։ Հայաստանում տեղի է ունեցել հեղափոխություն, իսկ այստեղ առհասարակ իշխանական բուրգն է փոխվում։ Ինչո՞ւ եմ այդպես ասում, որովհետև ընտրությունները միաժամանակ լինելու են և՛ նախագահի, և՛ Ազգային ժողովի։ Փաստորեն, և՛ գործադիր, և՛ օրենսդիր մարմինները պետք է վերափոխվեն․ նոր կազմ է լինելու։ Դա նույնպես փոփոխություն է, բայց ընտրությունների միջոցով։
Ես կանխատեսում եմ, որ շատ ակտիվ են լինելու։ Մեր կուսակցությունը կողմ է, որպեսզի լինի ակտիվ, թեժ մրցակցություն, բայց չթշնամանանք մեկս մյուսի դեմ, որովհետև այսօրվա քաղաքական մրցակիցներս վաղը կարող է միասին կանգնենք մի խրամատում։ Այս հրամայականը բոլորս միշտ պետք է հիշենք»։
Տևական ժամանակ Արցախից, նաև այսօրվա թեկնածուներից որոշները պարբերաբար հանդես էին գալիս պաշտոնական Երևանի դեմ, և բնորոշումներ կային, որ սերմանվում է ատելություն։ Հիմա ի՞նչ խմորումներ են Արցախում․ «Առաջին լրատվական»-ի հարցին Դավիթ Բաբայանը պատասխանեց․ «Դուք քաջատեղյակ եք, որ մենք բազմիցս հայտնել ենք՝ անթույլատրելի է, որ որևէ ձևով Մայր Հայաստանի և Արցախյան Հայաստանի (դա այն տերմինաբանությունն է, որը շրջանառության մեջ է դրել Արցախի պահպանողական կուսակցությունը) միջև թշնամանք և տարաձայնություն լինի։ Ավելին՝ իմ ֆեյսբուքյան եթերներից մեկի ժամանակ ես դիմել եմ մեր հանրությանը և կոչ եմ արել, որ առհասարակ հայաստանցի բառակապակցությունը չօգտագործել, որովհետև մենք բոլորս ենք հայաստանցի։ Աշխարհագրորեն տարանջատելու համար կարող ենք ասել երևանցի, սևանցի, սյունեցի, արցախցի, բայց ոչ հայատանցի և ղարաբաղցի։ Ի միջի այլոց, այդ ղարաբաղցի, հայաստանցի տերմինները մտցվել է 1920-ական թվականներին Ադրբեջանի կողմից, որպեսզի տարանջատվի»։
Մանրամասները՝ տեսանյութում։
