Չինաստանում Covid-19 կորոնավիրուսի տարածման էպիկենտրոն համարվող Հուբեյի նահանգի վարչակազմը տարածաշրջանի բոլոր բնակիչներին, ներառյալ գյուղացիներին, արգելել է դուրս գալ տներից, գրում է South China Morning Post-ը: Փողոցներում արգելված է հետիոտների հայտնվելը և ցանկացած տրանսպորտի երթևեկությունը, բացի ոստիկանության և արտակարգ ծառայությունների ավտոմեքենաներից: Նաև մարդկանց արգելել են հավաքվել մաջոնգի կամ թղթախաղի համար։
Փողոց դուրս գալու արգելքը խախտելու համար քաղաքացիներին կարող են ձերբակալել մինչև տասն օր ժամկետով: Տրանսպորտով երթևեկության արգելքի խախտման համար պաշտոնյաներն սպառնացել են նույնպիսի ձերբակալություններով, 500 յուան տուգանքներով և վարորդական իրավունքների զրկմամբ:
Անցած 24 ժամվա ընթացքում նահանգում արձանագրել են կորոնավիրուսով վարակման 1933 նոր դեպք և 100 մահ: Հուբեյի մայրաքաղաք Ուհանում, որտեղից 2019 թվատկանի դեկտեմբերին սկսեց տարածվել նոր վարակը, մեկ օրում մահացել է 76 հիվանդացած և հայտնաբերվել է նոր վարակման 1 690 դեպք, հաղորդել է «Ինտերֆաքս»-ը: