Նոյեմբերի 28-ին «Հայաստան» համահայկական հիմնադրամն անցկացրեց ազգային նվիրատվության 22-րդ հեռուստամարաթոնը՝ «Ես իմ անուշ Հայաստանի. կենարար ջուր և արև համայնքներին» խորագրի ներքո: Նվիրատվությունները շարունակվում են առ այսօր:
Թեմայի շուրջ «Առաջին լրատվական»-ի հետ զրույցում «Հայաստան» համահայկական հիմնադրամի տնօրեն Հայկակ Արշամյանը նշեց. «Որոշել ենք ամփոփել հեռուստամարաթոնի արդյունքները, որպեսզի փակենք այն բոլոր խոսակցությունները, թե այս տարի ավելի քիչ գումար է հավաքվել, քան նախորդ տասը տարիներին: Բազմիցս հանդես ենք եկել հրապարակումներով այն մասին, որ դա իրականությանը չի համապատասխանում: Խոստացված գումարները և հավաքագրված գումարները տարբեր բաներ են, և հաճախ դրանց չափը կարող է չհամընկնել… Այսօրվա դրությամբ հիմնադրամին հանգանակվել է 11 միլիոն 115 հազար դոլար»:
Հ. Արշամյանի հավաստմամբ՝ կառույցներ կան տասը երկրներում, և բացի Իրանի և Լիբանանի համայնքներից, որոնք տնտեսական ծանր իրավիճակում են, մյուս երկրների կառույցներից հանգանակություններ են եղել: «Լիբանանի անցած տարվա հանգանակած գումարները ուղղեցինք հենց Լիբանանի կրթական հաստատություններին»,- նշեց մեր զրուցակիցը: Նա նաև հավելեց, որ Նիդերլանդներում գործող կառույցը արդեն չորս տարի է չի գործում: «Նիդերլանդներում ՀՀ դեսպանի աջակցությամբ աշխատանքներ կիրականացվեն, որպեսզի վերականգնվի համայնքային կառույցի հոգաբարձուների խորհուրդը,- նշեց Հ. Արշամյանը: Նրա խոսքով՝ աշխատանքներ են իրականացվելու աշխարհագրությունն ընդլայնելու ուղղությամբ. «Փորձելու ենք գտնել այնպիսի անձանց, նվիրյալների, ովքեր պատրաստակամությամբ կլծվեն հանգանակության աշխատանքին»:
Մանրամասն՝ տեսանյութում:
