Ադրբեջանական Trend լրատվական գործակալությունը, վկայակոչելով Վրաստանի պաշտպանության նախարարությանը, հայտնում է, որ Թբիլիսիի մերձակայքում ընկած Վազիանի բազայում մեկնարկել են Agile Spirit վրաց-ամերիկյան զորավարժությունները։ Դրանց մասնակցում են ԱՄՆ ծովային հետևակայինները և Վրաստանի ցամաքային զորքերի 4-րդ հետևակային բրիգադը։
Զորավարժությունները տևելու են երկու շաբաթ, դրանց նպատակը ռազմական ստորաբաժանումների միջև փոխհամագործակցության ամրագրումը, փորձի փոխանակումը, ապստամբների դեմ ռազմական գործողությունների և խաղաղապահ օպերացիների անցկացումն է։
Ամերիկյան կողմից զորավարժություններին մասնակցում է 350 հետևակային, որոնք ներառված են ռումինական Կոնստանցա քաղաքում բազավորված հակաահաբեկչական գումարտակի կազմում։ Վրացական կողմից մասնակցում է 450 հետևակային։
Հիշեցնենք, որ Agile Spirit զորավարժությունները համարվում են պլանային, դրանք նշված են նախապատրաստման տարեկան պլանում և հանդիսանում են ԱՄՆ ծովային հետևակայինների կորպուսի ծրագիրը, որով վրաց զինվորականներին պատրաստում են Աֆղանստանում խաղաղապահ առաքելություն կատարելուն։
