Ապրիլի 5-ին Ազգային ժողովի կողմից ընդունված սահմանադրական փոփոխության հանրաքվեին «Այո» ասելու իրենց համաձայնությունն են տվել նախկինում ՀՀ վարչապետ Նիկոլ Փաշինյանի հետ պայքարի բարդ ու տատասկոտ ճանապարհ անցած «Հայ ազգային կոնգրես», «Հանրապետություն» կուսակցությունները։ Օրեր առաջ էլ «Առաջին լրատվական»-ին տված հարցազրույցում իշխանությունների այդ նախաձեռնության մասին դրվատանքով էր խոսել նախկինում մեկ այլ ընդդիմադիր՝ Հայաստանի ժողովրդական կուսակցության փոխնախագահ Գրիգոր Հարությունյանը՝ հավելելով, որ դա իր անձնական տեսակետն է։
«Օրինակարգ Սահմանադրական դատարանի ձևավորումը դիտարկելով որպես ներկա քաղաքական ճգնաժամի հանգուցալուծման անհրաժեշտ հանգրվան, ՀԱԿ-ը կողմ է ԱԺ-ի կողմից առաջարկված սահմանադրական փոփոխությանը և ակտիվորեն մասնակցելու է հանրաքվեին»,- ի մասնավորի նշված է ՀԱԿ-ի տարածած հայտարարության մեջ։
Ինչպե՞ս են մասնակցելու, շտաբնե՞ր են ձևավորելու, քարոզչությա՞մբ են զբաղվելու։
ՀԱԿ փոխնախագահ Արամ Մանուկյանը նշեց, որ իրենք միայն հանրաքվեին ակտիվ մասնակցելու մասին հայտարարություն են արել, իսկ հետագա քայլերի մասին ոչինչ չի կարող ասել։
«Մենք կողմ ենք, որ այդ խնդիրը լուծվի հանրաքվեի միջոցով, ժողովուրդն ասի իր վերդիկտը, որը բարձր է ամեն ինչից»,- ասաց Արամ Մանուկյանը։
«Ելնելով ստեղծված իրավիճակի հանգուցալուծման անհրաժեշտությունից, երբ գործադիր և օրենսդիր իշխանությունները փոխվել են օրինական ընտրությունների արդյունքում, իսկ դատական իշխանության հանդեպ կա տոտալ անվստահություն, և ՍԴ-ն համարվում է այդ իշխանության բարձրագույն մարմինը՝ հանրային ընկալման մեջ ունենալով նախկին իշխանության սպասարկուի անբեկանելի համբավ, իրավիճակ, որ չունի հանգուցալուծման քաղաքակիրթ այլ տարբերակ, քան հանրաքվեն, «Հանրապետություն» կուսակցությունը միանում է «Այո»-ի քարոզչությանը»,- իր հայտարարության մեջ նշել է «Հանրապետություն» կուսակցությունը։
Կուսակցության քաղխորհրդի անդամ, փաստաբան Հովիկ Արսենյանն էլ մեզ հետ զրույցում նշեց, որ պետք է այսօր քաղխորհրդի նիստ հրավիրեն և որոշեն, թե ինչպիսի մարտավարություն, ինչպիսի աջակցություն և քարոզարշավին ինչպիսի մասնակցություն են ցուցաբերելու։
Հարցին, թե ներկա քաղաքական-հասարակական մթնոլորտում ակնկալո՞ւմ են, որ ժողովուրդը ակտիվ կմասնակցի և 650 հազար քվե կտա սահմանադրական փոփոխություններին։
«Ես կարծում եմ, որ 650 հազարը շատ քիչ է, ավելին եմ ակնկալում, ես վստահում եմ մեր ժողովրդի իմաստությանը։ Գործող Սահմանադրությունը լեգիտիմ չէ, և, բնականաբար, այն հոդվածը, որը վիճահարույց է, պետք է փոխվի։ Եվ մեր իշխանությունները ճիշտ են վարվել, որ այն դրել են հանրաքվեի։ Սահմանադրությունը պետք է ընտրվի ժողովրդի կամքով, ոչ թե այն ձևեին, կարեին, պարտադրեին ժողովրդին»,- ասաց Հովիկ Արսենյանը։
