Առաջնորդվելով Սահմանադրության 206-րդ հոդվածով՝ ՀՀ նախագահը ստորագրել է Սահմանադրության փոփոխությունների հանրաքվեն ապրիլի 5-ին անցկացնելու վերաբերյալ հրամանագիրը:
«Հանրաքվեն ժողովրդի իշխանության իրացման լավագույն տարբերակներից մեկն է: Խորհրդանշական է, որ հենց ժողովուրդն է որոշելու Սահմանադրական դատարանի անդամների ճակատագիրը, այն նույն անդամների, որոնք տասնամյակներ շարունակ ոտնահարում էին քաղաքացիների իրավուքները»,- թեմայի շուրջ «Առաջին լրատվական»-ի հետ զրույցում ասաց «Իմ քայլը» խմբակցության պատգամավոր Սիսակ Գաբրիելյանը՝ հավելելով՝ ապրիլի 5-ն այն օրն է, երբ կարելի է հայտարարել. «Դատարա՛ն, ոտքի՛, ժողովուրդն է գալիս»:
Անդրադառնալով դիտարկմանը, որ մի շարք իրավաբանների կարծիքով՝ հանրաքվեի գնալը ռիսկային է, և ժողովուրդը ԱԺ-ին մանդատ է տվել նմանօրինակ որոշումներ կայացնելու համար, հարցը կարող էր լուծվել ԱԺ-ի կողմից, Ս. Գաբրիելյանը նշեց. «Եթե անգամ խորհրդարանը լուծեր հարցը, միևնույն է, ընդդիմադիրները քննադատելու էին: Մենք առաջնորդվել ենք Սահմանադրությամբ՝ 202-րդ հոդվածի համաձայն՝ ԱԺ նախագիծը չընդունվելու դեպքում ԱԺ 3/5-ի որոշմամբ այն գնում է հանրաքվեի՝ առանց ՍԴ կարծիքը հաշվի առնելու»: Պատգամավորը նաև հավելեց, որ ՍԴ որոշումը չէր կարող օբյեկտիվ լինել, քանի որ հարցը վերաբերում է ՍԴ անդամների հետագա գործունեությանը:
Սիսակ Գաբրիելյանի դիտարկմամբ՝ տրամաբանական կլիներ տեսնել Հրայր Թովմասյանի հեռանալը այն ժամանակ, երբ, ըստ էության, իրեն լքեց և հեռացավ ամբողջ քաղաքական թիմը և առաջին հերթին իրենց քաղաքական հայրը. «Այն, որ Հ. Թովմասյանը կապ ունի նախկին քաղաքական համակարգի հետ, նա չի կարող պաշտոնավարել այս պաշտոնում»:
«ՍԴ-ն իր աշխատանքային պատմությամբ աղերս չունի այն ամենի հետ, որով սահմանադիրն է ուզում գնալ»,- ընդգծեց «Քաղաքացու որոշում» սոցիալ-դեմոկրատական կուսակցության գործադիր մարմնի անդամ Միքայել Նահապետյանը՝ հավելելով, որ ՍԴ-ն հետևողականորեն աչք է փակել բազմաթիվ անօրինականությունների վրա:
Մ. Նահապետյանը վստահեցրեց, որ հանրաքվեի ժամանակ «Քաղաքացու որոշումը» «ոչ» չի քվեարկի: «Հանրաքվեի ճանապարհով տեսականորեն հնարավորություն կա լավ սահմանադրական դատարան ստեղծելու, բայց դա կախված է բազմաթիվ գործոններից,- նշեց Մ. Նահապետյանը:- Դա հնարավոր է այն դեպքում, երբ կառավարող ուժը հրաժարվի փոփոխվող սկզբունքներից, երկակի մոտեցումներից և հախուռն, հատվածական լուծումներ տալու գործելաոճից»:
Մանրամասն՝ տեսանյութում: