Իսպանիայի ոստիկանությունը հաղորդել է Եվրոպայում խոշորագույն քրեական խմբավորման բացահայտման մասին, որը զբաղվել է թմրանյութերի անօրինական շրջանառությամբ: Այս մասին գրել է El Mundo-ն: Նշվում է, որ օպերացիան իրականացվել է Իսպանիայի և ԱՄՆ իրավապահների կողմից: Ընդհանուր առմամբ ձերբակալվել է 20 մարդ, որոնցից 16-ը՝ Իսպանիայում, 4-ը` ԱՄՆ-ում:
Ոստիկաններն իսպանական քաղաքներից մեկում հայտնաբերել են թաքստոց, որտեղ եղել է 25 միլիոն եվրո: Ինչպես նշել են իսպանացի ոստիկանները, սա ամենախոշոր միաժամանակյա առգրավվումն է, որ երբևէ իրականացվել է Իսպանիայում: Բացի այդ, թե՛ ԱՄՆ-ում և թե՛ Իսպանիայում կալանվել է այդ հանցավոր խմբին պատկանող անշարժ գույք` 75 մլն եվրո ընդհանուր արժողությամբ:
Ձերբակալվածների մեջ է խմբավորման պարագլուխ Ալվարո Լոպես Տարդոն, որի խմբավորման անդամները էքստազի են վաճառել Մադրիդի դիսկոտեկներում: Բացի այդ, Տարդոնը և նրա եղբայրը զբաղվել են Իսպանիա կոկաինի ներկրմամբ: Ստացված գումարները խմբավորման ղեկավարությունը ներդրել է գույքի մեջ` մեքենաներ, բնակարաններ և այլն: 60 մեքենաների մեջ, որոնք առգրավվել են ոստիկանության կողմից, եղել է կոլեկցիոն Ford Cobra՝ 2 միլիոն դոլար արժողությամբ: Մեղքը հաստատվելու դեպքում Տարդոնին սպառնում է 20 տարվա ազատազրկում` գումարների լվացման և թմրանյութերի տարածման համար:
