Ադրբեջանական APA լրատվական գործակալությունը, վկայակոչելով ԵԱՀԿ-ի կայքը, հայտնում է, որ իրենց տարածաշրջանային այցի արդյունքներով ԵԱՀԿ Մինսկի խումբը հայտարարություն է տարածել, որում ասվում է.
«Այս տարվա հուլիսի 11-18-ը համանախագահներն այցելել են Մոսկվա, Վիլնյուս, Բաքու և Երևան։ Հուլիսի 11-ին համանախագահները ԵԱՀԿ գործող նախագահի անձնական ներկայացուցիչ Անջեյ Կասպրշիկի հետ միասին հանդիպում են ունեցել Ռուսաստանի արտգործնախարար Սերգեյ Լավրովի հետ։ Հանդիպման ժամանակ կողմերը քննարկել են Մինսկի խմբի շրջանակներում խաղաղ ճանապարհով ղարաբաղյան հակամարտության կարգավորման գործընթացում առաջընթաց գրանցելու հարցը։
Հուլիսի 13-ին Վիլնյուսում Լիտվայի արտգործնախարար (նաև ԵԱՀԿ գործող նախագահ) Աուդրոնյուս Աժուբալիսի հետ տեղի ունեցած հանդիպման ժամանակ համանախագահները նրան իրազեկել են հունիսի 24-ին Կազանի հանդիպումից հետ խաղաղ գործընթացին առնչվող իրենց կատարած քայլերի մասին։
Բաքվում և Երևանում համանախագահները համապատասխանաբար հանդիպումներ են ունեցել նախագահներ Ալիևի ու Սարգսյանի հետ։ Նախագահների հետ տեղի ունեցած հանդիպումների ժամանակ համանախագահներն ընդգծել են հիմնարար սկզբունքների շուրջ համաձայնեցման հասնելու կարևորությունը։
Նրանք նշել են, որ ժամանակն է քաղաքական կամք ցուցաբերել, ինչն անհրաժեշտ է ամուր խաղաղության հաստատման, տարածաշրջանի ժողովուրդների անվտանգության ու հաշտեցման համար։ Նախագահները հաստատել են շրջանակային փաստաթղթի համար առաջարկվող վերջին ձևակերպումներին անցում կատարելուն իրենց հավատարմությունը և գործընթացի խաղաղ կարգավորման որոնման հարցում համանախագահների և համանախագահող երկրների հետ աշխատանքը շարունակելու կարևորությունը»։
