ԱԺ պատգամավոր Արման Բաբաջանյանը ֆեյսբուքյան իր էջում գրել է․
«Եվրասիական տնտեսական միության անդամ երկրները քննարկում են որոշ հարցերում վետոյի իրավունքից ազգային կառավարությունների հրաժարվելու հնարավորությունը և դրանցով որոշումներ կայացնելու իրավունքի փոխանցումը վերազգային մակարդակ»,- հայտարարել է Եվրասիական տնտեսական հանձնաժողովի Կոլեգիայի նախագահ Տիգրան Սարգսյանը: «Ես կառանձնացնեի մի քանի սկզբունքային հարցեր, որոնք այսօր քննարկել ենք. նախ՝ այն հարցերը, որոնցում հնարավոր է հրաժարվել վետոյի իրավունքից և փոխանցել վերազգային գործառույթները վերազգային մարմնին՝ Կոլեգիային»,- ասել է նա՝ ավելացնելով. «Որովհետև եթե ազգային կառավարությունը պահպանում է վետոյի իրավունքը, ապա այն թույլ է տալիս պահպանել իր ազգային ինքնիշխանությունը: Բայց, մյուս կողմից, եթե մենք ուզում ենք խորացնել մեր միությունը, դա ակնհայտ է, և բոլորը համաձայն են սրա հետ, ապա կան որոշ գործառույթներ, որոնք անհրաժեշտ է տեղափոխել վերազգային մարմիններին»,- նշել է նա:
Խնդիրն այն չէ, որ նման հայտարարություն է արել այն նույն Տիգրան Սարգսյանը, ով 2012 թվականին պնդում էր, թե ԵՏՄ-ին անդամակցությունը Հայաստանի համար անիմաստ է, որ դա չի բխում մեր երկրի շահերից: Տիգրան Սարգսյանը վաղուց դադարել է ներկայացնել Հայաստանի շահերը և հանդես է գալիս որպես եվրասիական պաշտոնյա: Իրականում խնդիրը շատ ավելի խորքային է և ուղղակիորեն կապված է մեր երկրի ինքնիշխանության հետ: Ավելին՝ այս հայտարարությունը, նման մտադրության առկայությունն իսկ մարտահրավեր է Հայաստանի ինքնիշխանությանն ու անկախությանը: Եվ խնդիրը միայն այն չէ, որ վետոյի իրավունքից զրկվելով՝ մենք կզրկվենք նաև ԵՏՄ-ին Ադրբեջանի կամ Թուրքիայի հնարավոր անդամակցությունն արգելափակելու հնարավորությունից: Դա այսբերգի երևացող կողմն է միայն:
Իրականում խնդիրը շատ ավելի խորքային է: Ակնհայտորեն Ռուսաստանի նեոկայսերական շահերի սպասարկման համար ստեղծված ԵՏՄ-ում վետոյի իրավունքից զրկվելով՝ մենք կդառնանք ուղղակի խամաճիկ պետություն՝ սպասարկելով Ռուսաստանի ծավալապաշտական շահերը: Սա գերսկզբունքային հարց է Հայաստանի համար, այնքան սկզբունքային, որ նման մտադրությունը իրականություն դառնալու դեպքում մենք պետք է լրջորեն քննարկենք ԵՏՄ-ին մեր անդամակցության նպատակահարմարության հարցը, որովհետև նժարին է դրվելու մեր երկրի ինքնիշխանությունն ու անկախությունը:
Կենսական ու կարևոր լինելով՝ այս հարցը նաև մարտահրավեր է առաջին հերթին Հայաստանի իշխանությունների, բայց նաև՝ քաղաքական ուժերի համար: Խորհրդարանական ընդդիմությունը, հինգերորդ շարասյան դեր ստանձնած ազգային դիմակներով հանդես եկող արտախորհրդարանական ուժերը պարտավոր են դիրքորոշում արտահայտել այս հարցի կապակցությամբ:
Այնպես որ, այս հարցը կարող է դառնալ քաղաքական դաշտի հերթական լյուստրացիայի պատճառը:
Հայաստանի ինքնիշխանությունն ու անկախությունը սակարկության ենթակա չեն որևէ պարագայում, այդ թվում՝ որևէ կառույցում անդամակցության հիմնավորմամբ: Այս սկզբունքը պետք է լինի անխախտ ու անքննարկելի որևէ կառույցի, այդ թվում՝ ԵՏՄ-ին անդամակցության շարունակականության հարցը քննարկելիս:
https://www.facebook.com/babajanyana/posts/3044128502284523?__xts__[0]=68.ARB-gISMdwxnlYV7ePpRxkiQwjSPyaoOTEoo7tTE3GOpkpMyiazWfirbWfoYNBix5P9JLwoXFBPAVm5ctHkmjk87RuyMWY68XoEwJ8O97WkmypQMQZq5kj6DFd9dKjJspHkeI7sHmDFWh9kSY8pFb4UbH5ZTdfttmeoqSy26BgSLDFisn8awISFRB0ASHI7zstKi9wFQrpL__IYDEWz1gT2c77CkhEBuaQ_ZheqBeIqZcFXRDVZU6qHTbC6m9ZSw31VkqH7E86Y3pFeQk4ckYOS2CXJTDfZ6dYlk7nOrcPuEaPeXlHe_6NPDSwMJuiA_Tyss1dK7sANefCakWJMt7Fj70wAH&__tn__=-R
