Գյումրիում ծնված մոսկվայաբնակ 12-ամյա Միլեն Կարանյանը շարունակում է իր ձայնային տվյալներով զարմացնել ռուսական շոուբիզնեսի ներկայացուցիչներին և ունկնդրներին:
Տարբեր ժանրերում հանդես եկող Միլեն Կարանյանն առաջիկայում պատրաստվում է մասնակցել Битва талантов հաղորդաշարին, համերգներով հանդես գալ Մոսկվայում և Հայաստանում:
Միլենը ծնվել և մեծացել է Գյումրիում, 9 տարեկանից ապրում է Մոսկվայում: Մայրը՝ Հասմիկը, երաժիշտ է, հայրը՝ Արմենը, քանդակագործ և դիզայներ է: Երեխան առաջին անգամ երգել է 6 տարեկանում: Երաժշտական դպրոց չի հաճախել, ամեն ինչ սովորել և սովորում է ինքնուրույն:
2019-ի դեկտեմբերի 11-ին, միջազգային ժյուրիի և փորձագետների գնահատմամբ, Միլենը դարձավ Ռուսաստանի և աշխարհի ռեկորդակիր՝ որպես ձայնային ամենամեծ դիապազոն ունեցող երեխա՝ գերազանցելով մինչ այդ եղած ռեկորդը և գրանցվելով ռուսական ռեկորդագրքում: Տարբեր լեզուներով ու ժանրերով ավելի քան 50 համաշխարհային հիթերի շարքում Միլենը ներկայացնում է նաև հայերեն երգեր:
