Պոլիէթիլենային տոպրակների օգտագործման արգելքի վերաբերյալ Շրջակա միջավայրի նախարարության առաջարկած օրենսդրական փոփոխությունը 2022 թվականի հունվարի 1-ից ուժի մեջ կմտնի։ Շրջակա միջավայրի նախարար Էրիկ Գրիգորյանը «Առաջին լրատվական»-ի հետ զրույցում վստահեցրեց. «Այս օրենքի կիրառումով ոչ թե միջազգային պարտավորություն է իրականացվում, այլ մեր նախաձեռնությունն է: Իրականացնում ենք մի քայլ, որին առաջիկա մի քանի տարվա ընթացքում կգնա ամբողջ աշխարհը»:
Ակնկալվում է, որ օրենքի ընդունումը կհանգեցնի շրջակա միջավայրի և մարդու առողջության պահպանման տեսանկյունից անվտանգ բազմակի օգտագործման պարկերի և տոպրակների օգտագործման մշակույթի վերականգնմանը:
Անդրադառնալով հարցին՝ «Լիդիան Արմենիայի» խնդրի հետ կապված «թայմ աո՞ւթ» է հայտարարված՝ նախարարը պատասխանեց. «Չեմ կարողասել՝ ինչ է հայտարարված, պաշտոնական հայտարարություն ո՛չ այս, ո՛չ այն կողմից չկա: «Լիդիանի» հետ կապված որոշակի գործառույթներ ենք իրականացնում: Եթե հիշում եք, 13 կետով անհամապատասխանությունների վերաբերյալ փաստաթուղթ էինք ներկայացրել վարչապետին, դրա շրջանակներում, ինչը որ կարելի է ուսումնասիրել, հետազոտել՝ փորձանմուշների մասով, մենք դա իրականացնում ենք, իսկ մյուս մասով տվյալները ներկայացրել ենք Քննչական կոմիտե, որպեսզի քրեական գործի շրջանակներում ուսումնասիրեն»:
Մանրամասն՝ տեսանյութում: