Ամերիկայի Միչիգան նահանգի բնակիչը փողոցում գտել է 27 հազար դոլարով արկղը եւ այն վերադարձրել է բանկ: Այս մասին հայտնում է Daily Mail-ը:
Հունվարի 21-ին Ջորջ Կոնդեշը բանկոմատի մոտ նկատել է արկղ, որի վրա գրված է եղել «40 հազար դոլար»: Սկզբում տղամարդը մտածել է, որ դա աղբ է, բայց հետո որոշել է վերցնել արկղը, որպեսզի այն մեկ ուրիշը չգտնի: Նա արկղը դրել է մեքենայում եւ մոտեցել բանկի մուտքին:
Նա մտել է բանկ, արկղը դրել սեղանին եւ հարցրել. «40 հազար դոլարի համար պարգեւատրություն լինելո՞ւ է»: Բանկի աշխատակիցները զարմացել են: Փողերը գտնողը մտածում է, որ յուրաքանչյուր ազնիվ մարդ էլ այդպես կվարվեր:
Պարզվել է, որ բանկ դրամ բերող ինկասատորն արկղերից մեկը սխալմամբ մոռացել է փողոցում: Փողոցում տեղադրված տեսախցիկը ֆիքսել է, որ մինչ Կոնդեշի մոտենալը արկղը փողոցում մնացել է 20 րոպե:
Չնայած նրան, որ արկղի վրա գրված է եղել 40 հազար, արկղում 27 հազար դոլար է եղել: Բանկը Կոնդեշին դրամական պարգեւ է տվել: Բանկում պարզաբանել են, որ եթե տղամարդը որոշեր փախչել փողերով, ապա նրան շատ հեշտ հնարավոր կլիներ գտնել, քանի որ տեսախցիկն ամեն ինչ ֆիքսել է: