Ֆրանսիայի սոցիալիստական կուսակցությունը Արժույթի միջազգային հիմնադրամի նախկին նախագահ Դոմինիկ Ստրոս Կանի անունը դուրս է թողել Ֆրանսիայի նախագահական ընտրություններում կուսակցության կողմից ներկայացվող թեկնածուների նախնական ցուցակից: Ընդհանուր առմամբ, ներկայացված է 6 անուն: Այս մասին հաղորդում է RBC-ն:
Թեկնածուների ցուցակը հրապարակվել է հուլիսի 17-ին կուսակցության պաշտոնական կայքում: Մինչ սեռական սկանդալը Ֆրանսիայի նախագահի ամենահավանական հաղթող թեկնածու համարվող Դոմինիկ Ստրոս Կանը, փաստորեն, չի կարող հավակնել այդ պաշտոնին, չնայած այն փաստին, որ, ամենայն հավանականությամբ, նրա վրայից կհանվեն բոլոր մեղադրանքները, քանի որ սպասուհին, որը բողոք էր ներկայացրել ԱՄՀ նախկին նախագահի դեմ, ստել է և տարբեր ցուցմունքներ է տվել հետաքննության ժամանակ: Սոցիալիստական կուսակցության վրա չի ազդել նաև այն հանգամանքը, որ ֆրանսիացիների մոտ կեսն այս պրոցեսը համարել են շինծու և ցանկացել են նախագահական արշավի ժամանակ Դոմինիկ Ստրոս Կանին տեսնել որպես թեկնածու: