Այսօր որոշ լրատվամիջոցներում քննարկման թեմա է դարձել Ազգային անվտանգության ծառայության նախկին պետ Արթուր Վանեցյանի նոր գրառումը Twitter-ի իր էջում. «Ամիսներ առաջ իմ զգուշացումը երկրի անվտանգությանը սպառնացող վտանգների վերաբերյալ առնչվում էին նաև Սահմանադրական դատարանի շուրջ այն օրերից սկսած և մինչ օրս շարունակվող իրադարձություններին»:
Թեմայի շուրջ «Առաջին լրատվական»-ի հետ քննարկմանը մասնակցեցին ԱԺ «Իմ քայլը» խմբակցության պատգամավոր Վիկտոր Ենգիբարյանը, վերլուծաբաններ Հակոբ Բադալյանը և Գոռ Մադոյանը:
Այնպիսի տպավորություն է, որ ԱԱԾ նախկին տնօրենը որոշել է փոքր դոզաներով խառնվել քաղաքական կյանքին: Անդրադառնալով այս դիտարկմանը Հակոբ Բադալյանը նշեց. «Դա բարդ է գնահատելը, պետք է տեսնել, թե ինչպիսի շարունակություն կունենա այն ակտիվությունը, որով տարին սկսել է Ա. Վանեցյանը, բայց ընդհանուր առմամբ գործընթացը տեղավորվում է ներքին քաղաքական տրամաբանության շրջանակում, որ անխուսափելիորեն պետք է հաջորդեր թավշյա հեղափոխությանը, այսինքն՝ քաղաքական բեմի վրա, անշուշտ, պետք է հայտնվեն դերակատարներ, ամբողջ խնդիրն այն է, թե ինչպիսի դերակատարներ են հայտնվելու, եթե չեն հայտնվում նոր որակի և հանրության հետ նոր հարաբերության, նոր մեխանիզմներ և նոր առաջարկներ բերող դերակատարներ, այդ դաշտը պետք է լրացվի եղած ռեսուրսով՝ «հներով» կամ նրանց հետ համագործակցող այլ ռեսուրսներով: Հիմա մենք դա ենք տեսնում: Արթուր Վանեցյանն այդ խաղացողներից մեկն է, բայց նա, չեմ կարծում, թե ինքնուրույն խաղացող է: Այս գործընթացը տևական շարունակություն կունենա»:
«Ա. Վանեցյանը ՍԴ դատավորներին վաղաժամ կենսաթոշակի ուղարկելու օրինագծի վերաբերյալ գրառում կատարելով՝ փորձում է որոշակիորեն ակտիվություն դրսևորել, և ինչպես շախմատում, տեմպը իր ձեռքը վերցնել, ձեռքը պուլսին պահել՝ առաջինն արձագանքելով տարատեսակ թեմաներով տարբեր հարցերի»,- նշեց Գոռ Մադոյանը:
Վիկտոր Ենգիբարյանը նկատեց, որ շատերը, ովքեր զգում են, որ հնարավոր է իրենց մեղսագրվի որոշակի արարքներ, փորձում են դառնալ քաղաքական գործիչ, որպեսզի հետագայում պնդեն, թե իրենք քաղաքական հալածյալներ են:
Հակոբ Բադակյանի դիտարկմամբ՝ այն գործընթացը, որ տեղի է ունենում, իշխանության համար շահեկան է. «Իշխանությունը, որպես քաղաքական մարմին, ձևավորվելու խնդիր ունի, և նորմալ է, որ կադրային փոփոխություններ են տեղի ունենում, դա բնորոշ է ցանկացած կառավարությանը: Հասարակական մեծ աջակցությամբ՝ Ն. Փաշինյանն ունի իր, այսպես ասած «Իսկանդերը»՝ քաղաքական զսպման լայն մեխանիզմ, բայց նրան անհրաժեշտ են օպերատիվ առաջնագծային մեխանիզմներ, որոնց ձևավորման համար ժամանակ է պետք:
Գոռ Մադոյանի դիտարկմամբ՝ Վանեցյանը իշխանությունից դժգոհ նախկինների հավաքական կերպարն է, ով փորձում է քաղաքական հայտ ներկայացնել և իշխանությանը հակադիր բևեռ ստեղծել. Վանեցյանը ընդունելի տարբերակ է նախկինների համար:
Մանրամասն՝ տեսանյութում:
