Նիգերիայի հյուսիս-արևելքի Մոնգունո քաղաքում առնվազն 20 զինվոր Է զոհվել և շուրջ հազար խաղաղ բնակիչներ են զրկվել օթևանից զինյալների հարձակման հետևանքով: Այդ մասին հունվարի 9-ին հայտնել Է Reuters գործակալությունը՝ վկայակոչելով այդ երկրի զինվորական շրջանների մի աղբյուր:
Գործակալության տվյալներով՝ մի խումբ զինյալներ, ներկայանալով որպես զինծառայողներ, հունվարի 8-ի երեկոյան մտել են Բոռնոյի նահանգի Մոնգունո քաղաք: Նրանք գրոհել են զինվորականների տեղական ստորաբաժանումների վրա, ինչպես նաև ավերել մոտավորապես 750 տուն:
Նիգերիայի զինված ուժերի ներկայացուցիչը հրաժարվել է մեկնաբանություններից: «Բոկո հարամ»-ն իսլամիստական խմբավորում Է, որը գործում է Նիգերիայի հյուսիսում և հյուսիս-արևելքում:
Նրա զինյալները նաև հարձակումներ են կատարում հարևան երկրների՝ Նիգերի, Կամերունի և Չադի տարածքներում: «Բոկո հարամ»-ը ձգտում է Նիգերիայի ամբողջ տարածքում հասնել իսլամական խալիֆայության ստեղծման և շարիաթի (իսլամական իրավունքի) նորմերի հաստատման:
2009 թվականից «Բոկո հարամ»-ի զինյալների կողմից ավելի քան 27 հազար մարդ է սպանվել Չադ լճի ավազանի երկրներում: Մոտավորապես 2,6 մլն մարդ փախստական ու հարկադիր վերաբնակ է դարձել: Հակամարտության գոտում հայտնված 11 միլիոնից ավելի նիգերիացիներ շտապ հումանիտար օգնության կարիք ունեն: 2015 թվականի մարտին խմբավորումը հավատարմության երդում է տվել «Իսլամական պետություն» ահաբեկչական կազմակերպությանը: ՄԱԿ-ի տվյալներով՝ վերջին տասը տարվա ընթացքում Նիգերիայում «Բոկո հարամ»-ի ձեռքով 35 հազար մարդ է զոհվել, հաղորդել է ՏԱՍՍ-ը:
