Սլավյանսկի «ժողովրդական քաղաքապետ» Վյաչեսլավ Պոնոմորյովը հայտարարել է, որ դաշնայնացման կողմնակիցները կանգնեցրել են ԵԱՀԿ դիտորդների ավտոբուսը, որովհետև նրանց ուղեկցում էին ուկրաինացի սպաներ:
Ուկրաինայի ԱԳ նախարարության տվյալներով` ապրիլի 21-ին երկրի հարավ-արևելք է ժամանել ԵԱՀԿ ռազմական դիտորդների խումբը` Գերմանիայի ղեկավարությամբ: Ուրբաթ օրը տեղեկություններ են եղել, որ խմբի հետ կապը կորել է Դոնեցկի մարզում: Ավելի ուշ, Ուկրաինայի ՆԳ նախարարությունը հայտարարել է, որ 13 ուղևորներով ավտոբուսը, որոնց թվում են ԵԱՀԿ 7 ներկայացուցիչ և Ուկրաինայի զինված ուժերի 5 ներկայացուցիչ, կանգնեցվել է անհայտ անձանց կողմից Սլավյանսկի մուտքի մոտ:
Պոնոմորյովի խոսքերով` ԵԱՀԿ-ի միկրոավտոբուսը կանգնեցվել է աշխարհազորայինների կողմից`անցակետերից մեկում: Այժմ, այն գտնվում է քաղաքի Անվտանգության խորհրդի շենքում, որը ևս վերահսկվում է ակտիվիստների կողմից:
Դոնեցկի մարզում Ուկրաինայի ՆԳ նախարարության գլխավոր վարչությունում ավելի վաղ նշվել է, որ միջոցառումներ են ձեռնարկվում ԵԱՀԿ առաքելության անդամներին որոնելու հետ կապված: Ոստիկանությունում նաև հայտնել են, որ հնարավոր է, նրանց հետ չեն կարողանում կապվել բջջային կապի բացակայության պատճառով: Նշվում է նաև, որ խումբը բաղկացած է երեք գերմանացի զինծառայողից, գերմանացի թարգմանչից և ռազմական դիտորդներից` Չեխիայից, Լեհաստանից, Շվեդիայից, Դանիայից:
