ԱԱԽ քարտուղարի պաշտոնից հրաժարականի դիմում ներկայացնելով՝ ՕԵԿ առաջնորդ Արթուր Բաղդասարյանը հայտարարեց ընդդիմություն դառնալու մասին:
Ինչպես հայտնի է, օրերս Արթուր Բաղդասարյանը նշանակվել է ՀԱՊԿ ակադեմիայի խորհրդի նախագահ, որը միջպետական պաշտոն է:
Այս առթիվ այսօր հրավիրած ասուլիսում ՕԵԿ նախագահին «Առաջին լրատվականը» հարց ուղղեց, թե նոր միջպետական պաշտոնը չի՞ կաշկանդի նրա ընդդիմադիր գործունեությանը: Նաև հետաքրքրվեցինք, թե ՕԵԿ-ի նախկին արևմտամետ կողմնորոշումը փոխվե՞լ է: Հիշեցնենք, որ 2006 թ. ՕԵԿ-ն ընդդիմություն դարձավ այն բանից հետո, երբ այն ժամանակ ԱԺ նախագահ Արթուր Բաղդասարյանը գերմանական թերթում հայտարարեց, որ Հայաստանի ապագան տեսնում է ԵՄ-ում և ՆԱՏՕ-ում: Դրան կոշտ արձագանքեց այն ժամանակվա նախագահ Ռոբերտ Քոչարյանը, որից հետո Բաղդասարյանը հեռացավ ԱԺ նախագահի պաշտոնից և ընդդիմություն դարձավ:
«Ես երբևէ նման հայտարարություն չեմ արել, դուք նման հայտարարություն չեք կարող գտնել»,- Հայաստանի ապագան ՆԱՏՕ-ում տեսնելու առթիվ մեր հարցին ի պատասխան՝ այսօր հայտարարեց Արթուր Բաղդասարյանը՝ հավելելով, թե ինքը կողմ է համագործակցությանը թե՛ Ռուսաստանի, թե՛ Արևմուտքի հետ: Միևնույն ժամանակ, ՕԵԿ նախագահը բացառեց ՀԱՊԿ ակադեմիայում իր նոր պաշտոնի ազդեցությունը ՕԵԿ ընդդիմադիր գործունեության վրա:
Հենց ասուլիսի ընթացքում համացանցում գտանք 2006 թ. Հայաստանի ապագան ԵՄ-ում և ՆԱՏՕ-ում տեսնելու՝ գերմանական թերթին իր հայտարարության առթիվ ՕԵԿ նախագահի այն ժամանակվա մեկնաբանությունը, թե իր հայտարարությամբ ԵՄ-ի և ՆԱՏՕ-ի հետ երկարատև համագործակցությունն է նկատի ունեցել: Ի պատասխան՝ Արթուր Բաղդասարյանը հայտարարեց, թե գերմանական թերթն այն ժամանակ խեղաթյուրել է իր խոսքերը:
Մանրամասները՝ տեսանյութում:
